Imphal, Naiwieng 11: Ki pulit ka jylla Manipur ki la pyndep ban thaw iaka Plan kaba bniah ban pynduh pyndam ia ki kper Poppy beain kiba la saphriang ha ki 516 tylli ki shnong ha ki 10 tylli ki district jong ka jylla, la iathuh u Additional Director General of Police (Law and Order) u Lhari Dorjee Lhatoo.
Haba kren sha ki nongthoh khubor, u ADGP Lhatoo u la ong ba ka sorkar jylla ka dang pynjur ïa ka jingpynpra iaki kper Poppy beain ha kaba ula batai ba kine ki kper ki long ka jingbei tyngka na ka bynta ki kam pynmih jingïakynad bad ki kam runar.
Haba maham ia kito kiba donkti ha ka kam rep Poppy beain, u heh pulit u la ong ba ki trai jaka ruh kin iakynduh ia ki jingeh ha ka liang ka ain.
“Uno uno uba shah lap ba u leh ia kane ka kam, kynthup ia ki trai jaka, un mad ia ki jingeh kiba jur katkum ka ain,” la maham u Lhatoo.
U la pynpaw ruh ia ki jingma kiba kham heh na ka jingrep Poppy kaba wanrah iaka jingpynjot ia ka mariang, ka jingpynjaboh iaka khyndew bad ka um daka jingpyndonkam dawai ka ban ktah ia ka koit ka khiah jong ki paidbah.
Kane ka jingpynbna ka long hapdeng ka jingtohkit kaba dang ïaid shakhmat halor ki katto katne ki kam runar kiba shyrkhei ha kylleng ka Jylla Manipur.
Ki pulit ki la iathuh ba la ithuh palat 30 ngut ki briew kiba donkti ha kaba iadei bad ki kam bapher bapher, kynthup ia ki jingshah rahbor, ki jingshah pyniap ia ki kynthei, ki khynnah bad ki nongialam niam, bad jing thombor iaki bor pahara.
Ha kajuh ka por, ki jingkhynra ba la ialam da ki bor syntiat ki dang iaid man ka sngi da ki kynhun iatreilang kiba kynthup ia ki pulit ka Manipur, Central Reserve Police Force (CRPF), CoBRA, Border Security Force (BSF), Assam Rifles bad ki shipai.
Ki jingkhynra ki long ban kem ia kiba donkti ha ki kam runar bad ban pynpra ia ki kynhun iatreilang haki kam beain kiba treikam ha kylleng ka jylla.
Ki bor Pulit kila maham ruh ba ki jingshah thombor jong ki bor pahara bad ka jingpynphriang ia ki khubor thmu kynshoit jaidbynriew kan lam shaka jingpynngat ain kaba tyngeh.
