Shillong, Naiwieng 11 : Ka sor Shillong kala sakhi ia ka jinghap phria kaba jur bha ha ka sngi Balang, kaba la pynlieh shaid ia kiba bun ki jaka khamtam ki surok, ki lynti iaid kjat bad ki jaka ieng kali.
Une u phria uba wan ryngkat u lapbah, ula lynshop ha ka por 11 baje mynstep bad por janmiet hadien ka jingkah dum u lyoh uba rben bha hangne ha sor.
Ka jingwan hap kynsan u phria kala pynkyndit ia kiba bun ki nongleit nongwan ha kaba la sakhi ba bun kila sei iala ki mobile phone bad ring video ia une u phria.
Ha ki katto katne ki jaka, u phria ula lum thup harud jong ki surok bad ki jaka madan, kaba pynlieh hi shaid ia ka jaka kumba long ka jinghap ior ha Kashmir.
Kane ka jingwan hap u phria bad u slap kala wanrah ia ka jingkhriat ba kynsan kynsan hapoh ka sor.
Kat kum ka kaiphod ka Meteorological Department (IMD), ka Shillong kala ioh ia u slap ba 28.4 mm hapdeng ka por 8:30 mynstep haduh 2:30 baje janmiet jong ka sngi Balang. Ka sor kala sakhi ruh ia ka jinghiar ka jingkhriat na ka 20.5°C sha ka 12°C.
Ka Meteorological Centre ha Shillong kala maham ban don ka jingther u slap, ka jingpom pyrkhat bad ka jingjur ka lyer ba iaid hapdeng 40-50km nalor u phria ha ki katto katne ki jaka ha Jylla.
