Wan pyniasoh u Bah Malcolm Tariang sha ka NPP
Shillong, Nailar 4 : Ka National People’s Party hynne ka sngi palei ka la kob ba kan jop lut ha baroh ki hynniew tylli ki constituency kiba don ha Shillong City ha ka elekshon MLA kaban long ha u 2023.
“Ka Shillong City baroh kawei mynta ka la shongshit ha ka NPP bad ngi buh beit ba na ki 7 tylli ki constituency ka NPP kan jop lut baroh,” ong u Bah Prestone Tynsong, National Vice President jong ka party bad Symbud Myntri Rangbah ka jylla.
U Bah Prestone ula kren ia kane ha ka jingialang pdiang sngewbha ia ka jingwan pyniasoh NPP u Bah Malcom Tariang, uwei na ki nongialam ba radbah jong ka party riewlum na Laitumkhrah constituency.
U Bah Malcom u dei uba la iakhun teng ruh ia ka elekshon MLA ha ki khyndiat snem ba la dep pyrshah ia ka Dr. Ampareen Lyngdoh MLA ba mynta ka Shillong East (Laitumkhrah ha kito ki por).
U Bah Prestone ula ong “ka jingwan jong u Bah Malcom, kumjuh ka jingwan treilang jong ka kynhun baroh kawei na ka Congress sha ka NPP ka la nang pyntikna shuh shuh ba kin jop suk na Shillong East ha ka elekshon ban wan”.
“Nga nud ban ong ba ngi la tikna lypa ba ka Shillong East kadei kawei na ki constituency kiba ka NPP ka la tikna lypa ban jop ha u 2023,” ula bynrap.
Na ka liang u Myntri Rangbah, Conrad K Sangma u la ong ba ka party katba nang iaid ka por ka la nang kiew arted namar ki nongshong shnong ki la iohi ia ka lynti ba ka jingtreikam jong ka NPP ka dei ban wanrah ia ka jingkylla kaba ki angnud.
“Ki don shibun ki kam kiba ngi la dep ban trei bad ki dang don ruh shibun kiba ngi dang hap ban trei shuh shuh namar kine baroh kidei tang ki jingsdang,” u la ong.
Haba iadei bad ka jingwan pyniasoh jong u Bah Malcom, u Conrad u la iathuh ba ka jingiakhun ban khring ia utei u rangbah ka dei kaba la slem bha watla ka jingithuh ithaw bad ka jingiajan ka la don mynta la palat 15 snem.
“Ka sngi kaba u Bah Malcom u pyntip ba un wan ban donlang bad ngi ha ka NPP ka dei ka sngi kaba kmen tam ha ka jingim jong nga,” u la bynrap.
We extend our warmest welcome to Mr. Malcolm Tariang, the office bearers & members of the new Block Executive Committee of 16-East Shillong constituency to the NPP family.
Together, guided by the values of the NPP, we will work for the progress of our State & our people. pic.twitter.com/EYelE7CC4f
— Conrad Sangma (@SangmaConrad) August 4, 2022
U ong ruh ba da ka jingdon jong kum kitei ki riewrangbah ha ka party kin ioh ruh ban ia syllok bun bha ki kam na ka bynta ban kyntiew ia ka party ha ki liang baroh.
