Shillong, Nailar 04: Ka seng National Hynniewtrep Peoples Federation (NHPF) kala lap ba bun ki karkhana ba heh ka them Ri-Bhoi ki khlem siew satia ia ka bai bording naduh u snem 2005, kaba la kot sha ka T. 44 klur tam.
Kane ka seng kala lap ia kane lyngba ka RTI bala pan naka Ophis u Chief Engineer (CE) ka Meghalaya Power Distribution Corporation Limited (MePDCL) bad iathuh ba kine ki karkhana ki dei kiba don ha ka thain Umiam bad Byrnihat Industrial Estate.
Haba kren bad ki lad pathai khubor, u President ka NHPF Bah Andreas Nongkynrih u la pyntip ba kat kum ka RTI, ki don haduh 36 tylli ki karkhana ha Umiam Industrial Estate bad 22 tylli ki karkhana ha Byrnihat Industrial Estate ki ba khlem siew ia ka bai bording kaba la kot haduh T.44.57 klur.
“Kat kum ka kaiphod RTI, ka bai bording bala pynsah da ki karkhana ha Umiam kala kot ia T.2.45 klur katba kiba ha Byrnihat kila pynsah haduh T. 42.45 klur. Haba khein lang, ka bai bording ba pynsah baroh kala kot T. 44.57 klur” ula ong.
U Bah Andreas u ong ba ki paidbah ka Jylla khamtam kiba na Ri-Bhoi District kim lah satia ban pdiang ia ka rukom leh jong ka Tnad Bording ne ka MePDCL ban map noh ia kane ka bai bording ba pynsah da kine ki karkhana.
Ula ong ba haba phai pat sha ki riew paidbah, ka Tnad bording khamtam ka MePDCL ka ju pynkyrkieh ban ot ia ka bording lada kim lah ban siew ia ka bai bording kaba kot tang da ki hajar tyngka.
