Guwahati, Nailar 04: Ka Assam ka la kylla long ka ktem bathymmai na ka bynta ki jingtreikam jong ki kynhun seng lehnoh jihadi, ha ka ba haduh san tylli ki jingtreikam ki ba don ia ka jingiadei bad ka seng lehnoh napoh Bangladesh, ka Ansarul Islam la lapdien naduh kine ki san bnai kynthih, ong u Myntri Rangbah (CM) Himanta Biswa Sarma hynne ka sngi Palei.
Hynriew ngut ki nongshong shnong ka Bangladesh ki ba dei na ka kynhun seng lehnoh Ansarul Islam ki la wan rung sha Assam na ka bynta ban pynrung dkhot ia ki khynnah samla, ha ka ba uwei na ki u la shah kem noh hadien ba la lapdien na Barpeta naduh u bnai Lber mynta ka snem, ong u Sarma ha ka jingialang bad ki lad pathai khubor.
“Ki jingialap hapdeng ki khynnah samla mulsim ha ki jaka aijinghikai ba shimet ba la tip kum ki madrasas, kata lyngba ki nongialam niam ki ba na shabar ka jylla ka long ka ba ima shibun,” ong u Sarma.
“Ki rukom treikam jong ki lehnoh jihadi ki iapher shibun na ki rukom treikam jong kiwei pat ki kynhun seng lehnoh. Kine ki sdang da ki jingialap bad ki jingpynshai ki ba neh bun bun snem, bad hadien bud sa ka jingiashim bynta ban kyntiew ia ki kam ialeh pyrshah bad ban sdang ia ki kam pyntriem,” ong shuh shuh u CM ka Assam.
Shuh shuh u la ong ruh ba ki nongshong shnong ka Bangladesh ki ba la wan rung beain sha kane ka jylla ha ki snem 2016-17, ki la thaw ia ki ba bun tylli ki ktem aijinghikai ha ka por ba ka jingpang Covid-19 ka dang saphriang bha.
“Tang uwei napdeng kine ki nong Bangladesh ki ba la shah kem kat haduh mynta, bad Nga kyrpad ia ki nongshong shnong ba kin pyntip sha ki bor pulit lada jia ba ki iohi ia kino kino ki briew ki ba na shabar ka jylla ki ba kylla long ki nonghikai lane ki nongialam niam hapoh ki madrasa,” ong shuh shuh u Sarma.
