Shillong, Jylliew 27: U Myntri Sorkar bad MLA ka Mawhati Constituency Bah Dasakhiat Lamare u pyntip ba shen ka Sorkar kan sa pyntrei noh ia ka surok Umsning-Jagi Road ba 40 km ban pynsuk ia ka leit ka wan jong ki paidbah ka thain Mawhati.
Ka surok Umsning-Jagi Road ka dei kawei ka surok kaba la jot bha bad kaba la sah khongreng da ki snem hynrei da ka jingtynruh jong u MLA, ka Sorkar ba mynta kala pynioh ia ka song pisa ba kot T. 114 klur ban shna thymmai noh ia kane ka surok.
“Ka Sorkar kan sa sdang noh shen ban pyntrei thymmai ia ka surok Umsning-Jagi Road kaba la sah khongreng mynta la palat 40 snem. Ka jingkhongreng kane ka surok ka dei namar ka jingbym don ka jingmaramot ne jingshna thymmai” ong u bah Dasakhiat haba iakren bad u nongthoh khubor.
“Lada ka suinbneng ka ailad, ka kompani ka lah ban sdang noh mynta ka taiew ne ha ka taiew ban wan ban shna thymmai ia kane ka surok” ula bynrap.
U Myntri ula pynpaw ia ka jingsngew nguh ia ka Tnad PWD bad ia ki Heh Ophisar kiba la shimkhia ban pynioh ia ka jingmang tyngka ban shna ia kane ka surok kaba iaid lyngba ka Mawhati Constituency ban pyniasoh bad ka Assam.
“Nga pan map na ki paidbah ka Mawhati Constitunecy ba ngi la iakhun naduh u snem 2018 ban ioh ia kane ka surok bad naduh ka sngi ba nga jop ia ka elekshon, kala buh ia kane ka surok hakhmat eh bad nga la phah ia ki jingtyrwa. Nga sngewkmen ba mynta kane ka jingangnud jong ngi kala urlong shisha” ula ong,
U Myntri u pyntip ba ka kompani kaba ioh ban pyntrei ia kane ka surok, kan hap ban pyndep ia ka kam hapoh ka 6-7 bnai haba ong “Nga kular ba wat lada ngam ialeh shuh ia ka elekshon MLA na Mawhati Constituency hynrei ngan iai buddien beit ia kane ka surok haduh ba kan da dep pura”,
“Nga kyntu ia ki paidbah ba kin ai ka jingshaniah ha nga ym ban sheptieng ioh ka kut noh ka jingpoi ka surok namar nga hi ngan buddien beit wat lada nga bunkam katno katno ruh” ula ong.
U la pynpaw ruh iaka jingsngewnguh ia ki seng bapher kiba don ka jingsngewkhia ia ka jingeh ki paidbah kiba ju wan ud wan nam ha u kum u nongmihkhmat shaphang ka jingsah khongreng katei ka surok bad mynta kane ka jingangnud jong baroh kan sa urlong noh.
