Shillong, Risaw 11: Ka kynhun ialehkai cricket ka Meghalaya kala shah pynliem biang sa ha ka kynhun ialehkai ka Tripura da 8 wicket ha ka sien ialehkai balai jong ka Group C hapoh ka Vinoo Mankad Trophy, kaba long ha Pune hynnin ka sngi nyngkong.
Haba job ia ka jingkynting pisa, ka Meghalaya kala jied ban tied nyngkong hynrei kila iaksaid ban kamai run naduh kaba sdang bad kila hap wicket lut tang hapoh ka 23.5 over bad ioh kamai tang 78 run.
U Mrinal Das u dei uba kamai bun eh da 22 run katba u Ayushman Das ula synniang da 10 run.
Ha ka jingbeh thong, ka Tripura kala lah ban kynjoh ia ka thong tang hapoh ka 13.3 over.
Ka Meghalaya kan ialehkai biang lashai ka sngi Balang pyrshah ia ka Vidarbha.
