Guwahati, Risaw 11: Khnang ban kyntiew shuh shuh ia ka jingpyniasoh lyngba ki lynti rel na Tripura sha kiwei pat ki bynta jong ka ri, ka Northeast Frontier Railway (NFR) kala shim ia ka rai ban bteng ia ka jingai jingshakri lyngba ka rel Guwahati Express hapdeng ka Guwahati-Kolkata shaduh sha Agartala, ong ka khubor heh sorkar hynnin ka sngi Nyngkong.
Na ka liang u Chief Public Relations Officer (CPRO) ka NFR u Sabyasachi De ula ong ba kane ka rel hapdeng ka Guwahati-Kolkata kan bteng ia ka jingshakri ka jong ka shaduh sha ka nongbah Agartala ka Tripura shisien shitaiew.
Ia ka jingplie na ka bynta kane ka jingpyniaid rel ba kyrpang yn kaweh lama da ka president ka ri ka Droupadi Murmu ha ka sngi Palei ka ban wan na Agartala railway station.
Na ka liang u CPRO ula ong ba ha kane ka jingplie yn pyniaid lyngba ia kane ka rel lyngba ka New Karimganj, New Haflong, Guwahati, Goalpara Town, Kokrajhar, New Coochbehar, Kishanganj, Katwa bad Bandel.
Ha ka jingai jingshakri ka ban iai bteng, kane ka rel hapdeng ka (Agartala-Kolkata) kan mih na Agartala man la ka step sngi Balang bad poi ha Kolkata ha ka jan miet jong ka sngi kaba bud.Ha kaba wanphai lyngba kajuh ka lynti, kane ka rel kan mih na Kolkata man la ka sngi U Blei bad poi ha Agartala ha ka janmiet sngi ba Ar.
Ka President ka ban pynlut ia ka sngi ha Tripura kan leit ruh ban plie ia ka Judicial Academy bad ruh ban buh ia u mawnongrim na ka bynta ka jingtei ia ka National Law University ha Narsinghgarh, ha ki bynta ba pajih na Agartala.
Na ka liang ka sorkar Tripura kan pynlong ruh ka jingpdiang sngewbha ia ka president Murmu, ka ban plie ruh lyngba ka kor internet (virtually) ia kiba bun tylli ki projek ha Tripura.
