Shillong, Naiwieng 12: Ka jingiakhun halor ka Shillong Ropeway Project ha ka sngi Palei, kala long hapdeng ki nongiakhih kiba leit tur sha Secretariat ban dawa pynduh noh ia ka project, katba u MLA ka South Shillong Bah Sanbor Shullai ula leit ban tyrwa ha u Myntri Rangbah ka Jylla ban weng ia ka jingeh lyngba ka jingstad saïan.
Haba ialam ia ka 19th South Shillong Advisory Committee, u Bah Shullai ula aiti ia ka dorkhas sha u Myntri Rangbah ka Jylla u Conrad K. Sangma ban kyntu ia ka sorkar ban thung ia ka Expert Committee kaba laitluid ban khmih ia ki jingkam jong ka JAC ba ka Ropeway kan pynjulor ia ki tyllong um.
U Bah Shullai ula ong, ba ka committee kala leh katkum ka jingpynkup bor jong kito kiba kyrshan ia ka jingtohkit da ki riewstad ha ka jingialang kaba la pynlong ha ka sngi Balang ha State Convention Hall.
“Kito kiba kyrshan ia ka jingtyrwa ban thung ia ka expert committee kila wan ban aiti ia ka jingtyrwa. Hynin ka sngi, ngi lah buh ia katei hakhmat jong baroh ki Dorbar Shnong, kiba iadonbynta lang bad ka JAC, hynrei ha ka jaka ban iakren halor kane ka jingtyrwa, kila pynmih pynban ia ka huri hura ha ka jingialang” ula ong.
Ula ong, ba u Myntri Rangbah uba dang leit jingleit ha kylleng ki jaka, yn iakynduh ia ka Committee ha ka taiew ban wan ban iakren halor kane ka jingtyrwa.
“Ngi ngin sa iakren bad u Myntri Rangbah namar ba ka jingtyrwa ka jong ngi kadei ban thung ia ka Expert Committee kaba laitluid,” ong u Bah Shullai.
U Myntri ula kyntait ruh ia ka jingkynnoh ka JAC ba la shu pynwai hak dak ia ka jingialang.
“Kine baroh kidei ki bym shisha bad ki bym don nongrim. Kaei kaei ka jingkynnoh kaba kila kynnoh pyrshah ia baroh kiba iashimbynta ha ka jingialang baroh ki long kiba bakla bad ki bym don nongrim. Kadei ka jingkren kaba kila shu thaw” ula ong.
Halor ka jingleit tur ka JAC, u Bah Shullai ula ong, ba yn ym kren eiei, hynrei ula pynpaw ba kito kiba la don ryngkat bad u ha kaban aiti ia ka dorkhas kidei ki nongshong shnong kiba shisha jong ka Laban bad ka 19th South Shillong.
Ka dorkhas kala kyrpad ban thung ia ka Expert Technical Committee da kaba shim na ki jaka pule kiba bha tam jong ka ri, kaba kynthup ia ka IIT bad NIT, ban pynlong ia ka jingwad bniah kaba laitluid halor ka jingsngewkhia jong ka JAC.
Kala maham ruh ba ka jingbteng ban pynslem kan pynkiew ia ka dor jong ka jinglut ia katei ka projek bad kan ktah ruh ia ka pisa u paitbah. Kala maham ruh ba ka jingpynduh pyndam noh ia katei ka projek khlem ka jinglap ne jingdon ia ki sabut katkum ka jingstad saïan kan long pyrshah ia ka jingsngew ia kiba bun kiba donbynta lang ha ka kam, kaban lam sha ka jingpynthud ia ki kam pynroi ha ka 19th South Shillong.
