Shillong,Naiwieng 12 : Ka jingiakhih pyrshah ia ka Shillong Ropeway Project kala jan pynmih ia ka huri hura kaba jur shabar ka Secretariat ha ka sngi Palei hadien ba ki Pulit kila khang ia ki nongiakhih ban thom ia ki jingker bad knieh noh ia ki tusok ba kila wanrah ban iashong kyllain mungor hakhmat ka khyrdop.
Kane ka jingiapyni bor kala mih hadien ba ka Joint Action Committee kala iatur paidbah na ka jaka iakhih ba don hakhmat u mot Kiang Nangbah sha Secretariat, haba dawa ia ka Sorkar ban pyndam ne pynkynriah noh ia ka project sha kiwei pat ki jaka.
Ki nongiakhih kila pyrshang ban thom ia ki jingker bala pynieng mar pyrshah ka khyrdop, haba dawa ba dei ban ailad ia ki ban shong iakhih hakhmat ka Secretariat.
Ki Pulit kila ieng skhem khlem ka jingailad bad kila weng ia ki tusok ba kila wanrah lang ban iashong kyllain mungor, kaba lam sha ka jingiania kaba jur hapdeng ki arliang mamla.
Ia kane ka jingiatur paidbah la pynlong hapdeng ka jingpahara kaba khlain bha, kaba la jia ruh shisngi hadien ba ka JAC kala kyntait ia ka jingtyrwa jong ka South Shillong Advisory Committee, ban kyrpad ia ka Sorkar Jylla ba kan thung ia ka jingtohkit ba laitluid da ka Expert Committee halor ka project bad ka jingktah jong ka ia ka mariang.
Ia kane ka jingtyrwa la iakren ha ka jingialang bala pynlong da u Myntri Sorkar bad MLA ka South Shillong Bah Sanbor Shullai ha ka sngi Balang ha State Convention Centre.
Ki kynthei ba iakhih, kila rah lang ia ki placard ba dawa ia ki hynniew ngut ki Rangbah Shnong ka Laban ba kin hiar shuki noh mardor bad ban pyndam noh ia ka soskular aiwai jaka ba kila iasoi bad ka tnad Tourism.
Kila ong ruh “Ka kam jngohkai ka lah ban leit shano shano ruh hynrei ka catchment area kam lah ban leit. Ki paidbah ki donkam ia ka um na Lum Shyllong, bad ba ka roi ka par khlem ka jingstad ka dei ka jingpynjubor kaba da mang tyngka”.
Ki nongialam ka JAC kila ong ba kin nang pynjur ia ka jingiakhih tad haduh ba ka Sorkar ka kloi ban pyndam bad pynkynriah noh ia ka project sha kiwei pat ki jaka.
