Shillong, Naiwieng 12: U Myntri Rangbah ka Jylla u Conrad K Sangma ha ka Sngi Palei ula plie ia ka Shillong Literary Festival kaba Hynriew ha Ward’s Lake, kaba long sa kawei ka sienjam kaba la nangroi ha ka rynsan ka thoh ka tar, ka jingdon sap bad ka jingsam mar kylliang ia ka kolshor.
U Conrad ula ong, ba ka long kaei kaei kaba ai mynsiem ban iohi ba kane ka tamasa kala jam shaphrang naduh ba la sdang ia ka 6 snem mynshwa.
“Kaei kaba la sdang kum ka buit hapdeng ka jingbym long thikna kala kylla long kum ka rynsan kaba kongsan ha kaban rakhe ia ka thoh ka tar, jingdon sap bad ka jingpashat ia ki jingai jingmut kiba thymmai” ula ong.
Ula ong ba ka tamasa kadei shi bynta jong ka jingiohi jngai ban ailad ia ki samla ba kin shem ia la ka sap ka phong, ban pynpaw ialade bad ban iakren bad ki briew kiba stad bad shemphang na kylleng ki ri.
U Myntri Rangbah ula pynpaw ia ka jingkyrmen ba kane ka tamasa kan poi sha kylleng ki sor bad ban ioh ruh ia ka jingdon ha ka rynsan ha ka pyrthei. Ula kitbok ia ki nongthoh kot, ki nongdro dur, ki nongpynïaid bad ki nongiashimbynta ba kan long kaba jop bad ka ong, ba kane ka prokram kadei ban iai bteng ban ai mynsiem ia ki samla bad ban saiñdur ia ka jingsngewtynnad kaban iaineh ha ka thoh ka tar bad ka jingdon ia ki sap ki phong.
Nyngkong eh la pynlong ha u Naiwieng 2021, ka Shillong Literary Festival kadei kaba la pynwandur kum shi bynta jong ka jingpyrshang ka Sorkar Meghalaya ban kyntiew ia ka thoh ka tar, dro jingdro, kolshor bad ka rukom pyninam ia ka sap ka phong.
U Sangma ula plie ia kane ka tamasa kaba la sdang nyngkong ha ka 25 tarik u Naiwieng 2021 ha Ward’s Lake ha rungkat ka jingdonlang u Ambassador ka ri Japan sha India u Satoshi Suzuki.
Naduh bala sdang, kane ka tamasa kala wanrah lang ia ki nongthoh kot, nongthoh poitri, ki nongpathai khubor, ki nongpynmih kot bad ki nongpule na kylleng ka thain shatei lammihngi bad na kylleng ki bynta ka ri India, ryngkat bad ka jingpynshlur ia ka kolshor ban pule bad ban thoh hapdeng jong ki khynnah samla.
Ka Ward’s Lake kala long ka jaka pdeng jong kane ka tamasa ha kaba kane ka prokram kala nang iar katba nang mih ki snem ban kynthup ia ka jingiakren bad ki nongthoh kot, jingiakren halor ka thoh ka tar, jingpyllait kot, jingpule ia ki poitri, jingak drama, jingtem bad ka jingdro dur.
Kane ka tamasa kala sdang naduh ka 12 tarik haduh ka 14 tarik u Naiwieng, ka iai bteng ia ka riti dustur haba ka pyrshang ruh ban pyni shabar ia ka sur halor ka thoh ka tar ka thaiñ bad ka rukom iathuhkhana ki jaidbynriew Khasi, Jaintia bad Garo.
Ka bynta kaba kongsan mynta u snem kadei ka “First Bloom: Discovering New Writing from the Northeast”, kaba thmu ban ithuh bad pynshlur ia ki nongthoh kiba dang shu mih na ka thain kiba thoh ia ki kot ha ki bynta ki bapher bapher.
Kane ka tamasa kala kiew sha ka jingthrang ba ka Shillong kan don ha ka kyrdan kum ka jaka kaba kongsan ha ka thoh ka tar, da kaba wanrah lang ia ki nongthoh bad nongpule bad ka jingthaw ia ki lad bad ki kabu kiba iar ia ka thain shatei lammihngi ka ri India kum ka jaka kaba sei ia ka sap ha ka thoh ka tar.
