Shillong, Naiwieng 12 :Kawei ka Longkmie kala ujor da ka ejahar sha ki Pulit pyrshah ia ki dkhot ka Joint Action Committee (JAC) ba pyrshah ia ka Shillong Peak Ropeway Project, haba kynnoh ba kila kynthoh pynjah burom ia ki Khun jong ka, hadien ba mih ka jingiania ha ka jingialang ba pynlong da u Myntri Sorkar Bah Sanbor Shullai.
Ia kane ka ejahar la mudui da ka kong Ladaphila Kharbuli, ka nongshongshnong ka Lower Lumparing, Dong Ranab, Shillong, ha Laban Police Station ha ka sngi Balang. Kat kum ka ejahar la kynnoh ba ka JAC kala kynthoh pynjah burom ia khun jong ka, Pynhunlang Kharbuli bad u Pyrsa kurim Anthony Marwein, ba ju iatip kum u Bah Bun.
Kat kum ka ejahar, kane ka kam kala mih na ka jingialang bala pynlong ha State Convention Centre ha ka sngi Balang, ha ka por 5 bae eiei, kaba long hapdeng u Myntri Bah Sanbor bad ki nongmihkhmat ka JAC ban iakren halor ka Shillong Peak Ropeway project.
Ka ejahar ka kynnoh ba hadien ba kut ka jingialang, katto katne ki dkhot ka JAC kila pyrshang ban khang lynti ia u Myntri ba un mih na kane ka jaka haba dawa ba un ai jubab.
Ka kam ba ka Khun bad u Pyrsa kurim kila tuklar ban ai jingiada ia u Myntri hadien ka jingioh ba ki dkhot ka JAC kila leit tur da ka jingbitar sha u Myntri.
Ka ejahar ka kynnoh ruh ba hadien kane ka jingjia, ki lad pathai khubor kila pynmih ia ki video kiba pyni ia ki dkhot ka JAC kiba la kynnoh bunsien ia arngut ki briew kum ki “Gang” khlem da ai ban ai kano kano ka sakhi kaba khlain.
La kynnoh ruh ba ki dkhot ka JAC kila pynithuh khlem da dei ia ka khun Pynhunlang Kharbuli kum ka Personal Seurity Officer (PSO) jong u MLA, ka jingkam ba ka nongujor kala kyntait jur.
Haba niew ia kane ka jingkynnoh kum ka jingkynthoh kaba pynjahburom ia ka Iing ka sem jong ka bad ia ka kur Kharbuli, kala kyntu ia ki Pulit ba kin tohkit ia kane ka am bad ban leh eiei kat kum ki kyndon ain pyrshah ia ki briew kiba donkti.
