Shillong, Risaw 11 : U Nongialam ka NPP bad Myntri Sorkar James K Sangma ula ong ba bun ngut ki MLA ba mynta kin sa wan ban pyniasoh noh sha ka NPP hashuwa jong ka elekshon MLA 2023.
“Kin don bun ngut ki MLA ki ban sa pyniasoh noh shen sha ka NPP” ong u James haba iakren bad ki nongthoh khubor.
Haba kylli la baroh ki MLA ba mynta kin ioh ia ka ticket na ka party, une u Nongialam ka NPP ula ong “Nga tharai kane ka dei ka jingkylli kaba ngi hap ban ap tad haduh da pynbna ia ka elekshon hynrei kine ki dei ki kam ban gam lah ban jubab namar nga ruh nga dei uwei na ki MLA ba dang pan ia ka ticket ka party. Nga tharai kan bha eh ban buh ia kane ka jingkylli sha National bad State President”.
Hynrei ula ong pat baka NPP kan sa pynbna ia ka thup kyrteng jong ki kyrtong hadien bala pynbna ka Election Commission of India (ECI) ia ka Elekshon.
Ula ong ba ki don katto katne ki kyrtong kiba la dep ban pynbna da ki Nongialam ka Party hynrei ia kiba bun hi yn sa pynbna hadien ba dep pynbna ia ka elekshon.
U James ula pynpaw ruh ba um don jingtip la u Myntri Rangbah ka Jylla bad para jong u, u Conrad K Sangma u don jingthmu ban iakhun na artylli ki Constituency ha kane ka elekshon ban wan. “Ngam don jingtip ia kane, kan bha ban kylli na u (CM)”.
