Guwahati, Iaiong 25: U MLA ka All India United Democratic Front (AIUDF) na Dhing Constituency, u Aminul Islam u la shah kem ha ki pulit ka Nagaon ha ka sngi Palei hadien ka jingkren paidbah jong u halor ka jingjia ha Pahalgam, kaba la pynbitar lep ia ri baroh kawei.
U Islam u la kynthoh ha ki social media ba ka jinghiar thma jong ki lehnoh ha ka 22 tarik u Iaiong ha Pahalgam, Jammu bad Kashmir- kaba la shim ia ka jingim ki 26 ngut ki nongwan jngoh kai pyrthei Hindu- ka dei ka “jingsuhbuit ba la thoh da u Myntri Rangbahduh ka ri u Narendra Modi bad u Myntri kam Pohïing u Amit Shah.”
Kane ka jingkynthoh jong u kala saphriang sted bha ha ki social media, uba la shah kynthoh jur bha namar ba kala ktah matïong bad kane ka lah ban pynmih ka jingiakynad hapoh ka ri.
Haba pyntikna ia kane ka jingshah kem kaba la thoh ha ka X, u Myntri Rangbah ka jylla Assam u Himanta Biswa Sarma u la kdew, “Kane ka jingkren kaba la kynthoh halor ka jingshah thombor kadei kaba la thmu da ka BJP ka lah mih ka jingbitar bad ka jingiakynad hapdeng ar kynhun ka ban lam pat sha ka jinglong jingman kaba sniew.
Ia u Islam la kem na ka iing sah ka jong u bad la pynngat ia u ha kiba bun ki kyndon jong ka Bharatiya Nyaya Sanhita (BNS), ba kynthup ia ka Sections 152, 196, 197(1), 113(3), 352, and 353— bad kaba nyngkong eh dei bad ka jingpynkhih win, ki kam pyrshah ri, bad ka jingpynthud ia ka shongsuk shongsain paidbah.
Kane ka jingshah kem kadei kaba nyngkong ha Assam pyrshah ia ka jingkynnoh donkti sain pyrthei kaba lah ban mih ka jingsngewpher niam hadien ka jingjia shah hiar thma ha Pahalgam, ha kaba ki tnad syntiat ki la pynthikna ba ka dei ka jingshah thombor ba la kyrshan da ka Pakistan.
Haba kynthoh jur halor ka jingbym lah shah jong ka jylla ia kum kine ki jait jingkynthoh, u Myntri Rangbah ka Assam ula thoh ha kawei ka post, “Ka Assam kan shim ia ka sienjam ba tyngeh pyrshah ia kito kiba nud ban iada halor ka jingshah hiar thma ba shyrkhei ha Pahalgam. Ai ba kin tip shai bha: Kito ki briew kiba kwah ai daw halor katei ka jingjia halor ka jingshah pyniap ba shyrkhei jong ki mynsiem ba lui lui kim dei kiba ki pyndonkam hok ban pynpaw ne freedom of expression—Hynei ki ieng pyrshah bad ki mynsiem kordor ba la duh noh jong ka India.”
Haba kren halor kane ka jingshah kynthoh, u khleih duh jong ka AIUDF u Maulana Badruddin Ajmal u la kiar ia ka party na ka jingkren u Islam. “Ka jingkynthoh jong u Aminul kam dei ka rai jong ka party.Ngi la dep ban pynshai ia ka nongrim ba ngi ieng mynta ka sngi ha ki kot khubor” ong u Ajmal, bad bynrap ruh, “Ha kum kane ka por ngi dei ban ieng lang bad ka sorkar. Ki lehnoh ki sah hi ki lehnoh bad kine kim don jait, ka jingngeit ne ka niam. Ki pynrem ia ka niam Islam bad ki Muslim”.
 na Dhing Constituency, u Aminul Islam u la shah kem ha ki pulit ka Nagaon ha ka sngi Palei hadien ka jingkren paidbah jong u halor ka jingjia ha Pahalgam, kaba la pynbitar lep ia ri baroh kawei.){kind=link}