Shillong, Iaiong 24: U Symbud Myntri Rangbah ka Jylla u ba khmih iaka tnat Transport Bah Sniawbhalang Dhar, hynne ka sngi Palei, u la pyntip ba ki kam kin sa sdang noh shen ban pynheh ia ka Kad liengsuiñ Shillong Airport ha Umroi.
“Ka Airports Authority of India (AAI) ka la khot Tender bad ka jingtrei kan sa sdang shen ia ki kam. Ngi don ka jingkyrmen ba ha kaba kut jong u snem 2026, ki liengsuin kiba heh kin sa wan hiar ha kane ka Kad liengsuin” ong u Bah Sniawbhalang.
Ka jingpynheh iaka Kad Liengsuin ka kynthup ia ka jingpynheh ia ka Runway kaba la don lypa 571 meter, da kaba pynheh shaka 2,400 meter bad kane kan pynsuk ruh ia ka jinghiar ki liengsuin A-320 haka Kad Liengsuin.
Nalor kata, kane ka projek ka kynthup ia ka jingpynheh ia ka Terminal Building bad Apron ha ryngkat bad kiwei ki kam pynroi.
Katkum ka jingpynbna Tender, la antad ba ka jinglut jong kane ka projek pynheh Kad Liengsuin ka long T.119.44 klur, bad ka por ba la khmih lynti ban pyndep ka long 18 bnai, kynthup ia ka jingsangeh trei kaba lai bnai namar ka aiom lyiur.
