Shillong, Naiwieng 6: Ki san tylli ki Ayushman Arogya Mandir (AAM) kiba treikam kum ki Sub-Health Centre (SHC) ha Meghalaya ki la ïoh ïa ka National Quality Assurance Standards (NQAS) Quality Certification, kaba long ka mawjam kaba kongsan ha kaba pynkhlaiñ ïa ki jingshakri ha ka koit ka khiah ha ka jylla.
Ka jingpynskhem, kaba la ai da ka National Health Systems Resource Centre (NHSRC), ka ithuh ïa ka jingbha jong ki jingshakri ha ka koit ka khiah ba la pynbiang da ki san tylli ki jaka ai jingsumar ha kylleng ki district jong ka West Jaiñtia Hills, North Garo Hills bad West Khasi Hills.
Ki syrnod ba la ai ki long ka Saitsama AAM-SHC bad Mihmyntdu AAM-SHC ha West Jaiñtia Hills, Raja A.pal AAM-SHC bad Narongkol AAM-SHC ha North Garo Hills, bad Manai AAM-SHC ha West Khasi Hills.
Ha ka jingjop kaba kongsan, ki san tylli ki jaka sumar ki dei ki AAM-SHC ba nyngkong eh ha Meghalaya ban ïoh ïa ka NQAS Quality Certification ha baroh ki 12 tylli ki jingshakri, kiba pyndep ïa ki kyndon ba la buh ha kylleng ki tnad ka koit ka khiah.
Ki 12 tylli ki jingshakri ki kynthup ia ka oral health care; common ophthalmic and ENT, kiba ar met bad ka jingkha khun; ka koit ka khiah ha ka por khynnah bad samla; ki dawai bad ki jingpeit bniah; ka jingsumar pang ia kiba la tymmen bad kiba pynjem jingpang; ki jingshakri ba kyrkieh ha ka liang ka koit ka khiah; ka jingpynbeit ia ka iing ka sem; ki jingpang ba lah ban saphriang; ka jingkoit jingkhiah ha ka bor pyrkhat; ki jingpang bym lah ban saphriang; bad ki jingshakri ha ka koit ka khiah jong ki khyllung bad ki khyllung ba dang kha.
Napdeng ki san tylli ki jaka sumar, ka Saitsama AAM-SHC ka la ïoh ïa ka Overall Assessment Score kaba heh tam kaba long 94.07%, bud sa ka Mihmyntdu AAM-SHC kaba 93.91%, ka Raja A.pal AAM-SHC kaba 93.30%, ka Narongkol AAM-SHC kaba 92.87% bad ka Manai AAM SHC kaba 91.07%..
Ka jingjop ka pyni ia ka jingpyrshang jong ka jylla ban pynbha ia ka jinglong, ka jinglah ban ioh bad ka jingshngain jong ki jingshakri ha ka koit ka khiah ha ka kyrdan ba shapoh, da kaba pynleit jingmut ha ka jingsumar kaba pynshong nongrim ha ki nongpang.
Ka syrnod ka ithuh ruh ia ka jingnoh synniang jong ki Multi-Purpose Health Workers (MLHPs), ki Auxiliary Nurse Midwives (ANMs) bad kiwei kiwei ki nongtrei ka koit ka khiah, kiba ka jingpyrshang jong ki ka la long ka atiar ban pyndep ia ki kyndon ba la buh.
