Tura, Iaiong 14: U Symbud Myntri Rangbah ka Jylla u Prestone Tynsong hynne ka sngi Nyngkong ula banjur ia ka jingdonkam ban kynmaw ia ka histori kaba shisha jong ka Garo Hills Autonomous District Council (GHADC) bad ban pynthikna ba ki pateng ban dang wan kidei ban sngewthuh ia ka jinglong kongsan ka jongka.
Haba kren ha ka jingrakhe ia ka jingdap 73 snem jong ka GHADC kaba la pynlong ha District Auditorium ha Tura, u Bah Prestone Tynsong uba khmih ruh ia ka tnad District Council Affairs ula pynkynmaw ia ka jingtrei shitom jong ki nongialam kiba la khlad noh kiba kynthup ia u Captain Williamson Sangma bad kiwei kiwei ki nongialam kiba la noh synniang na ka bynta ka roi ka par jong ka jylla kynthup ha kaban pynurlong ia ka jingdawa ban ioh ia la ka jylla kaba pura ha u snem 1972.
Ula banjur ia ka jingkongsan ban tip ia ka histori kaba shisha shaphang jong ka Council bad ka jylla bad ula ai burom ia ki nongialam kiba la donkti ha ka jingthaw ia ka GHADC, khamtam ia u Capt. Williamson A. Sangma u CEM uba nyngkong eh jongka GHADC ha ka por ba la sdang iaka ha ka 14 tarik u Iaiong 1952 ha ka por ba ka thain ka dang hap hapoh jong ka jylla Assam. Hadien kane u Capt. Williamson A. Sangma ula jam shaphrang ruh ban long u Myntri Rangbah uba nyngkong eh jong ka jylla Meghalaya ha u snem 1972.
Nalor kane ula pynpaw ruh ia ka jingkongsan jong ki District Council bad ka long ruh kaba donkam ba ki pateng ban dang wan ba kidei ban sngewthuh ia ka jingkongsan, da kaba kdew ruh ba hashwa ban ioh ia la ka jong ka jylla, kila hap hapoh jong ka jylla Assam.
U Bah Prestone ula kyntu ruh ia ka jingdonkam ban khmih bniah bha ia ka rukom treikam, ka jingkitkhlieh bad ban don ruh ia ka jingiatreilang ban iakhun ia kino kino ki jingeh bad ka jingdonkam ban don ia ki riewstad ha ka lain Technical ban pynthikna ban buh ryntih bad ban lah ruh ban pynkhlain ia ka rukom lum khajna.
Da kaba banjur ia ka jingkongsan jong ka Sixth Schedule bad ka jinglong trai ia ka jaka, ula ong ba 96-98% jong ki jaka ha ka jylla Meghalaya ki hap hapoh jong ka Sixth Schedule jong ka riti synshar ka ri bad kane kan iarap ha kaban pynneh pynsah ia kine ki jaka pateng la pateng.
Ula bynrap ruh ia ka jingdonkam ban pynkhlain shuh shuh ia ka Sixth Schedule bad ia ka bor treikam jong ka Council bad ula banjur ruh ia ka jingkongsan ka jongka na ka bynta ka lawei jong ka jylla Meghalaya.
U Chief Executive Member (CEM) ka GHADC u Albinush R. Marak, ula ai jingbatai ia ki kam kiba la jop kiba la leh da ka Council bad halor ka jingioh lum ia ka khajna da ki tnad bapher bapher bad ula banjur ruh ia ka jingdonkam ban don ia ka Council ha kaban pynneh pynsah ia ki riti dustur tynrai naduh ki por mynshwa bad ban kyntiew ia ka jingsuk bad jingshngain.
Ha kane ka jingrakhe, la ioh ruh ia ki jingpynbyrngia lyngba ki jingrwai bad ki jingshad tynrai na ka Tura Town Higher Secondary School, Tura, ka Tura Music Academy, ka Dokaku Art and Cultural Association bad ka St. Xavier’s Higher Secondary School, Tura.
 bad ban pynthikna ba ki pateng ban dang wan kidei ban sngewthuh ia ka jinglong kongsan ka jongka.){kind=link}