Shillong, Iaiong 17 : U MLA ka UDP na Khliehriat Bah Kyrmen Shylla ha ka sngi Thohdieng, ula kyrpad ia ka Sorkar Jylla ba kan mynjur lem ia ka mang pisa na ka bynta ka skhim sam um ban lah weng ia ka jingkyrduh um ha ki 7 tylli ki shnong hapoh ka constituency jong u, haba pynpaw ba ki Khlieh Synshar Shnong kila dep ban ithuh lypa ia ka tyllong um.
“Ngin sa leit jurip ia kine ki 7 tylli ki Shnong- Moolamanoh, Moolang, Musniang rim, Musniang kmai, Rangat, Lumbothoi bad Moonongtdu – kiba mad jingeh bha namar ka jingkyrduh umbam umdih” ong u Bah Shylla.
U iathuh ba ki Khlieh Nongsynshar jong kine ki 7 tylli ki Shnong kila dep ban ia ithuh lang ia ka tyllong ban tan ia ka um.
“Nga sngewkmen ban pyntip sha phi ba ka don kawei ka tyllong um kaba la dep ban ithuh da ki khlieh synshar jong kine ki shnong bad ngin sa leit ban jurip shen bad nga ngeit ba kane ka tyllong um kan lah ban ai bun ka um ban lah sam sha kine ki shnong” ula ong.
Haba kubur ia ka jingdon ki project ba dang pyntrei, u Bah Shylla ula ong ba kine ki project kin nym lah ban kynthup lang ia ka thain.
U Bah Shylla ula ong “Ia mynta ngim iohi ia ka jingartatien ba ka Sorkar kala mang ia bun tylli ki skhim ha ka constituency jong nga bad ha East Jaintia Hills baroh kawei, ha kaba ngi la iohi ia ki project kiba heh kila don ha ka jingpyntrei hynrei kine ki project kin nym lah ban pynbiang shispah na ka shispah ia ka jingsam um sha man ki longiing bad man ki shnong ki thaw”.
“Kine ki 7 tylli ki Shnong kaba ngi sngew ba kin nym ioh satia ia ka umbam umdih kaba biang. Nga ngeit ba kane ka tyllong um kan lah ban pynbiang ia ka um sha man ki longiing khnang ba ki briew jong ngi kin ioh ia ka jingsuk haba phai sah ka jingioh umbam umdih” ula ong.
Une u MLA ula pynpaw ia ka jingsngewskhem ba ka Sorkar kan ai jingmynjur ia kane ka jingtyrwa. “Nga ngeit ba hadien ba ngi phah ia ka jingtyrwa, ka tnad kan sa mang pisa ia ka project bad ngin sa iohi ba kan treikam” ula ong haba bynrap “Nga ngeit ba ka Sorkar kan khmih ia kane bad ban mang ia ka pisa ba donkam ban pyntreikam ia kane ka skhim um”.
