Nongpoh, Iaiong 17 : Ka Synjuk ki Rangbah Shnong ka Ri-Bhoi District, kala buh ia u dak jingkylli halor ka jingnoh synniang jong ka Hima Mylliem sha ka bha ka miat ki khun ki ra-iot ka Ri-Bhoi haba kdew ba haduh 50% naka jingioh lum khajna ka Hima, ka wan napoh ka District.
“Kumba long mynta, ka Hima Mylliem kam shym la noh synniang eiei ruh em halor ka bha ka miat jong ki khun ki ra-iot ha ka District. Haba khein ia ka jingnoh synniang pat daka District, kam jin shuh iaka 50% ka jingioh lum khajna jong ka Hima kala mih na ka District” ong u President ka Synjuk Bah BB Makdoh haba iakren bad ki nongthoh khubor.
U Bah Makdoh ula kren ia kane haba dawa ia ka Hima Mylliem ba ka dei ban thung noh da u nongmihkhmat uba dei shnong trai na Ri-Bhoi District ba un long u dkhot hapoh ka Hima.
U ong ba ka Synjuk ka sngew donkam ba ka Hima ka dei ban thung ia uwei u nongmihkhmat na Ri-Bhoi District hapoh ka Dorbar la ki lah ban dei ki Syiem ne Lyngdoh Raid, ba un peit ia ki jingdonkam ki khun ki ra-iot, ki jingeh bad kiwei kiwei.
Kat kum ka jingong jong u, kala don teng ka jingdawa ha ki por bala leit noh ha kaba u Lat ula dep mynjur ban thung nongmihkhmat na Ri-Bhoi hapoh ka Dorbar ka Hima Mylliem hynrei kane kala shu jah noh.
“Ka por kala dei ba ngin don noh la u jong u nongmihkhmat sha ka Hima Mylliem uba dei na ka district, uba tip ia ka riti ka dustur, ka kolshor, ka rukom im, ka bam ka dih, ki jingeh baroh jong ka thain” ong u Bah Makdoh.
“Halor kane, ka Synjuk kan sa leit ban iakynduh ia u Chief Executive Member (CEM) ka Khasi Hills Autonomous District Council (KHADC) ban iakren halor kane ka mat” ula bynrap.
U Bah Makdoh u kynthoh ba ka Hima Mylliem ka ioh lum khajna bun bah na ki iew ki hat, ki khyrdop bapher bapher hapoh ka district hynrei ka Hima kam shem la noh synniang ha kino kino ki bynta ki jingdonkam jong ka District la ka dei ha ki jingjia ne ki kam bhalang.
