Shillong, Iaiong 17: U Secretary General ka Green Tech Foundation (GTF) Ritre Lyngdoh ha ka janmiet sngi Thohdieng, ula pynbna ba un sdang ïa ka jingshah thngan khlem pud sngi, hadien katto katne kynta bala pynkit ïa u Chairman sha Hospital hadien ka jingshah thngan kaba 9 sngi ban pyrshah ïa ka project ka tnat Tourism bad ka jingai wai kaba 60 snem ïa u dewlynnong Lumpongdeng ha Umiam.
“Ka koit ka khiah jong u chairman ka GTF hadien 9 sngi jong ka jingshah thngan ka la nang tlot bha bad ngi la sngewkhia jur ïa ka koit ka khiah” ong u Bah Ritre.
“Bad ruh, ngi tieng lada u chairman jong ngi um don bor shuh namar ka jingshah thngan, bad halor ka nongrim jong ka jinglong briew kumta ngi la shim ïa ka rai bad kyrpad ruh ïa u, ba ngi dei ban ïalam noh ïa u sha ka jaka sumar”.
U Bah Ritre u la pynshai ba ka jingiakhih kam pat kut.
“Kumba ka long mynta u Chairman jong ngi um pat pynsangeh ïa ka jingshah thngan jong u, lane kam shym la don kano kano ka jingshah pynsangeh ïa ka jingshah thngan jong u hynrei wat hapdeng ka jingsumar ruh, u dang khlaiñ namar un bteng ïa ka jingshah thngan jong u na ka jaka sumar”.
Haba pynbna ia la ka jong ka jingïakhih daka ba shah thngan, u Secretary General ula ong, “Nga kum u secretary general jong ka GTF nga la shim ia ka rai da kaba tip ba kane kan ktah iaka koit ka khiah jong nga ba ngan bteng ia kane ka jingiakhih daka ba shah thngan khlem pud sngi naduh mynta ka janmiet tad haduh ba ka Sorkar kan wan ryngkat bad ka jubab sha ngi da kaba ong ba kan weng noh ia jingiateh ban ai wai ia u dewlynnong Lumpongdeng naka bynta ki Resort bad Spa”.
Halor ka jingpynthikna jong u Myntri Rangbah ka Jylla ban pynshisha halor ka project, u Bah Ritre ula ong “U Myntri Rangbah u long u nongaiktien iaka jingong, nga kular ia phi, ngan pynthikna ia phi hynrei kam ju don ei ei kaba thikna shaphang kano kano kaba u kular”.
Haba ïadei bad ka shithi na ka tnat Tourism, u Bah Ritre ula ong “Hynnin ka sngi, ngi la ïoh pdiang ïa ka shithi na u joint secretary in-charge tnat Tourism ha kaba ki la pynshai, ba kan nym don kano kano ka jingtei ha Lumpongdeng hynrei ngi kwah ban buh jingkylli bad jubab kylla, lada ym don jintei, kumno la ai wai (Lease) jaka sha ka Umiam Hotels Private Limited ka ban neh palat 60 snem”.
“Kam don jingmut bad ka long kaba beij ba ka Sorkar kan aiti ia ka jaka khlem kano kano ka jingthmu, ka Sorkar ka hap ban pynshai namar kane ka mat kam dei shuh tang ka mat jong ka GTF, hynrei ka dei ka mat jong ka imlang sahlang jong ka jylla Meghalaya baroh kawei” ula bynrap.
Halor ka jingiakren bad ka Sorkar, u Secretary General ula ong “Naduh ka sngi kaba nyngkong, ngi la kren shai bha, lada don kano kano ka jingïakren, ka Sorkar kadei ban aid aka jingthoh, ngi long kiba la kloi ban ïakren, hynrei baroh kidei ban dei da ka jingthoh, ngin leit sha kum kane ka jingkhot ïakren na ka bynta ki rai kiba tei bad ka jingmyntoi kaba tei ia ka imlang sahlang jong ka Meghalaya baroh kawei.”
