Shillong, Apr 17: Lai tylli ki kynhun ialehkai kila ioh ia ka jingjop ba don burom ha ka jingiakhun jong ka 5th Meghalaya State League hynne ka sngi Thohdieng hynrei kiwei ki don hapdeng ka jingiakhun ba itynnad bha.
Ka Mawlarshong SC kala pynliem da 5-1 ia ka Seng Samla Umdang Pyllun ha ka Group H ha Mawkyrwat, katba ha Williamnagar, ka Janepih Youth SCA kala pynrem ia ka Attong Matgrik FC da 3-0 ha ka Group G. Ha Mairang, ka Langsning FC kala pynrem ia ka Mishon SSCC 4-1 ha ka jingiakhun ha ka Group F. Ka Mawphu SC kala jop da 1-0 ia ka Mawlum Tyrsad SCC bad ka Rymbai Shkenshynriah SC kala jop da 1-0 ia ka Jalaphet Moochut Pyrdung SC.
Mar ia sdang ka jingiakhun ka Umdang Pyllun kala ioh thep ia ka kol ha ka 30 minit lyngba u Rangkynsaistar Mawsor, hynrei hashwa ban kut noh ka kylla step ka Mawlarshong kala ioh thep 2 kol lyngba u Hopefullness Wanniang ha ka 36 minit bad u Arkwis Wanniang ha ka 43 minit.
Ka Mawlarshong kala bteng ban thep sa 3 kol ha ka kylla miet lyngba u Wiwonstar Nongsiej ha ka 74 bad 85 minit bad u Lenny Kravitz Lyngdoh ha ka minit kaba 83.
Ka Langsning, kala mad ia ka jingshah thep kol mar ia sdang ha kaba u Rikyrshan Warjri ula thep ia ka kol kaba sted tam ha ka MSL ha ka 3 minit na ka bynta ka Mishon bad hadien kane u Nelson Rymbai ula thep ia ka kol ha ka minit kaba 5 bad 8 bad hashwa ban kut ka kylla step u Kyrmenskhem Mukhim ha ka minit kaba 45 ban pynthikna ba ka Langsning kan tam da 2 kol.
Ha ka kylla miet ka Langsning kala ioh thep sa shi kol lyngba u Manbhalang Nongmin ha ka minit kaba 77.
Ka Attong Matgrik kam shim la lah ban ioh khur ia ka jingjop bad kala mad ia ka jingshah pynrem ha ka Janepih ha kaba ia ki kol la ioh thep da u Rishembhalang Wanniang ha ka 38 minit, u Banteilang Synnia ha ka 49 minit bad u Edyson Iawphniaw ha ka 65 minit.
Ha ka Group B ha MFA Ground, Shillong ka Mawphu SC kala jop da 1-0 ia ka Mawlum Tyrsad SCC ha kaba u Iakmenlang Khongjee ula pynthikna b aka Mawphu kan khur ia ka 3 point da kaba thep ia ka kol lyngba ka jingleit shut ia ka Penalty ha ka 90+4 minit.
Ka Rymbai Shkenshynriah SC kala jop da 1-0 ia ka Jalaphet Moochut Pyrdung SC ha ka jingiakhun ha ka Group D ha Khliehriat bad ia katei ka kol la ioh thep da u Monush Lapang ha ka minit kaba 74.
Kila don ar tylli ki jingiakhaid ha ka jingiakhun ia ka MSL, kaba kynthup ia ka Laskein SCSC pyrshah ia ka Lamin XI SCC kiba la iakhaid da 2-2 ha ka Group C ha Amlarem. Ka Laskein kala ioh thep kol lyngba u Rithrangmiki Biam ha ka 14 minit bad u Iomaikyjohn Lamare ha ka 77 minit katba ka Lamin XI kala ioh thep 2 kol lyngba u Jowel Khongdup ha ka 24 minit bad u Genial Lamin ha ka 44 minit.
Ha Wahiajer, ha ka Group E ka jingiakhun hapdeng ka Iatyllilang Lumsehkot CSC pyrshah ia ka Lamyrsiang SCC kala kut ha ka jingiakhaid da 1-1. U Soniroy Suchiang ula thep kol ha ka 58 minit na ka bynta ka Iatyllilang Lumsehkot bad u Eborki Marsharing ula ioh ban pyniakhaid da kaba thep ia ka kol ha ka 81 minit na ka bynta ka Lamyrsiang.
Ha ka sngi Saitjain kin don tang 2 tylli ki jingiakhun ha ka MSL ha kaba ka Umlakro SC kan iakhun pyrshah ia ka Lawbah SC ha ka Group F ha Mairang bad ka Maram FC kan iakhun pyrshah ia ka Balmanduri FC ha ka Group G ha Williamnagar bad kine ki jingiakhun baroh artylli kin sdang ha ka por 3 baje mynsngi.
