Shillong, Naitung 11: Ka Sorkar Jylla kala rai ban iatehlok noh bad ka North Eastern Electric Power Corporation Limited (NEEPCO) lem bad kiwei kiwei ki Public Sector Undertaking (PSU) jong ka Sorkar Pdeng ban pyntreikam ia ki Power Project, kiba la pyndam noh ia ki soskular Memorandum of Understanding (MoU) dang shen.
“Ngi la rai mynta ban iateklok bad ka NEEPCO lem bad ki PSU ka Sorkar Pdeng ban pyntrei ia ki Power Project kiba la dep pyndam ia ka MoA dang shen. Ngi la shimkhia ia kane” ong u Symbud Myntri Rangbah ka Jylla ba khmih ia ka Tnad Power Bah Prestone Tynsong haba iakren bad ki nongthoh khubor hynne ka sngi nyngkong.
Ha ka 20 tarik Iaiong, ka Sorkar Jylla kala pyndam noh ia ka MoU bala iasoi bad ki kompani shimet ha kaban pyntreikam ia ki saw tylli ki power project ha Jylla ba kynthup ia ka Kynshi Stage-I bad II Hydro Electric Project namar ka jingdon jong ka par Uranium.
Halor kane u Bah Prestone ula ong ba ka rai ban pyndam noh ia ka MoU ka dei namar ym shym la don satia ki kompani shimet kiba kwah ban pyniaid shakhmat ia ka kam. Hynrei, watla katta, ki dang don kawei ne artylli ki kompani kiba dang kwah ban pyntrei ia kine ki project.
U Bah Prestone ula pynkynmaw ruh ba ha u snem 2007, ka Sorkar kala iasoi ia ki MoU bad ki kompani shimet hynrei “Haduh mynta ngim pat iohi ba kawei ka project bala iasoi soskular kala treikam”.
“Ta ka daw, dangshen nga la pynlong ia ka jingialang bishar kam bad nga la pyndam noh ia bun na ki project namar ba kim don jingmut shuh hynrei ka NEEPCO bad katto katne ki kompani shimet kila pyni ia ka jingkwah ban pyntrei ia kine ki project bad katto katne na ki, ki don mynta ha ka lynti ban pyntrei biang” ula ong.
