Shillong, Naitung 11: U Symbud Myntri Rangbah ka Jylla bad National Vice President ka NPP Bah Prestone Tynsong hynne ka sngi nyngkong, ula bthah ia ki arngut ki MLA ka BJP-Bah Sanbor Shullai bad Bah A.L.Hek ba kin iapynbeit ia ki jingiakynad hapdeng jong ki, ha ka rynsan kaba dei ban iapynbeit.
“Kaei kaba nga don ban ong ka long ba ki (MLA) dei ban iapynbeit ha ka BJP Committe. Ka jingai jingmut jong nga ia kine arngut ba kin sngewbha leit iapynbeit ha ka rynsan kaba dei bad kata ka rynsan ka dei ka BJP Executive Committee lane kano kano kaba ki khot” ong u Bah Prestone haba iakren bad ki nongthoh khubor.
Ha ka 8 tarik Naitung, u Nongialam ka BJP bad Myntri Sorkar Bah Sanbor Shullai ula panmap halor ka jingjia ba jia ha ka jingialang wan pan jingkyrshan jong ka kyrtong iakhun Elekshon President ka NDA ba long ha Orchid Lake Resort myn ha ka 6 tarik Naitung bad ong ba kane ka jingjia ka dei kaba shu jia ryngkhat bad kaba pynwan dur bakla.
U Bah Sanbor ula dawa ruh ban ai jingsneng iala u jong u para MLA Bah A.L.Hek halor ka jingkynnoh ba ula shim kabu ban myntoi ha ka kam sain pyrthei, na kane ka jingjia ha Orchid.
U Myntri Rangbah ka Jylla Conrad Kongkal Sangma ula kular ban sa shim rai ha ka por kaba dei halor ka jingdawa jong ka UDP ban ai jingsneng ia u Bah Sanbor halor ka jingkynnoh ba u ‘i bein bad bym khein snep” ia u President bad Lamphang ka Iingdorbar Bah Metbah Lyngdoh ha ka jingialang bad ka Kyrtong ka NDA ka Draupadi Murmu.
La kynnoh ba u bah Sanbor ula pytnhut ia ka jingkren u Lamphang, uba dang kren halor ka jingshah thombor jong ki paid Riewlum ha kylleng ki bynta jong ka Ri.
Haba kyntait ban kynthoh ia kane ka jingjia, u Bah Pretone uba dei khmih ia ka Tnad Parliamentary Affairs ula ong ba um shym la don lang ha kane ka jingialang namar ba u don sha Delhi bad ula ioh jingtip ia kane tang lyngba ki lad pathai khubor.
“Ha ka jingshisha kum u Myntri ka Parliamentary Affairs, ngam don bynta eiei bad kane ka jingialang namar kam dei hapoh ka Iingdorbar hynrei shabar jong ka Iingdorbar. Kane ka dei ka jingialang halor ka elekshon…ta ka daw ngam don eiei ban kynthoh kum u Myntri ka Parliamentary Affairs” ula ong.
