Nongstoin, Lber 15: Ka kynhun ialehkai Lamare SC Shillong, ka la khur ia ka nam lahduh ha ka lympung ialehkai phutbol ba la tip kum ka Invitation Knock Out Football Tournament 2022-23, ba la pyniaid da ka New Nongstoin Sports Social and Cultural Club ha madan New Nongstoin.
Ka Lamare SC kala ioh rah ia kane ka nam lahduh hadien ba ka la lah ban pynliem ia ka Ri Bhoi United da shi kol la nod, ha ka final kaba la sakhi da ki paidbah bun byllien kiba la tuid ban sakhi ia kane ka jingialehkai final.
Haba phai sha ka jingialehkai, la sakhi ia ka sur ialehkai kaba mar biang bor. Pynban khyndiat minit hadien ba ka jingialehkai ka dang iaid, u nongap kol ka Lamare SC u la shah beh noh na madan ha u nongpyniaid u ba la sei da ka Red Card, hadien ba u la kum pynur jubor ia u rang ialehkai ka Ri Bhoi, u ba la ioh ia ka kabu ba biang bha ban thep kol.
Hadien kane ka red card, ka sur ialehkai ka la kylla syndet ha kaba ka Ri Bhoi kaba dang don 11 ngut ki rang ialehkai, ka la sdang ban teh lakam ia ka jingialehkai bad ka la ioh ruh bun bha ki kabu khamtam ha ka kylla miet. Hynrei, baroh ki kabu ki lehnohei lut bad watla bun bun sien ka la pyrshang ban khyrwit na kham pajih ka dieng kol, pynban bunsien ka bol ki kiew beit ia ka cross bar.
Hapdeng ka jingiakhun kaba la kham noh shilliang bad ba la poi ruh sha ka jingpynjlan por kata hadien ka 90+ minit, ka Lamare SC kaba don ha ka ia ka bok ka nusip, ka la ioh ban thep ia ka kol kaba itynnad na u Nelson Rymbai, ia kaba la pynbuh bha ruh da u Donlad Diengdoh.
Da kane ka shi kol, ka Lamare SC ka la khur ia ka nam lahdu bad khur ruh ia ka song tyngka ba T.7 lak tyngka. Katba ka Ri Bhoi United FC watla ka la iakhun tyngeh hynrei ka hap ban shu hun noh ha ka nam rem bad ioh pdiang ia ka song tyngka ba T 3 lak tyngka.
Ha kane ka jingialehkai na ka liang ka NNSSCC, ka la jied ruh ia u rang ialehkai ka Lamare SC kata u Donlad Diengdoh ban rah ia ka khusnam kum u rang ialehkai ba kynsai jong ka jingialehkai final.
La pynphuh pynphieng bad pynshongshit ia kane ka sngi da ki prokram bapher bapher kynthup ia ki jingpynkhalai nusip sha ki paidbah ba wan peit kai. Katba na ka liang u Bah Gabriel Wahlang MLA ba dang shu jop na Nongstoin Constituency, u la long u kongsan ban sam ia ki khusnam sha ki ar kynhun kiba la poi Final.
Haba kren ha ka jingialang shwa ban khylliap lama noh ia kane ka lympung, na ka liang u Kongsan u la khot la wer sha baroh ban iatreilang ha ki bynta baroh, khnang ban kyntiew ia ki kam ialehkai ba bun jait ha ka dong ka thain. U la kitbok bad ai mynsiem ruh ia ka NNSSCC ba kan nang pyntyllun ia ki kam bad ban iai bteng ban pynlong ki lympung jingialehkai, khnang ban sei ia ki sap ki phong jong ki samla kynthei bad shynrang jong ka thain.
