Guwahati, Lber 15: Ka sorkar Arunachal Pradesh ka la pyntreikam ia shibun tylli ki prokram kam pynroi kiba iadei bad ki jingtei ha ki jaka kiba don ha lynter khappud bad ka China, Bhutan bad Myanmar.
Ka jingkyntiew ia ki kam pynroi ha ki jylla ka thain shatei lammihngi (Northeast) ka long kaba donkam khnang ban lah ban tehlakam ia ki jingsyier na ki ri ba marjan.Ki jaka khappud jong ka thain Northeast ki la shah iehnoh mynta lah da ki bun phew tylli ki snem tad haduh kane ka sorkar India kaba mynta kaba thmu ban kyntiew ia kine ki jaka khappud.
Na ka liang u Symbud Myntri Rangbah (Dy.CM) ka Arunachal Pradesh u Chowna Mein u la ong ba ia ki jingtei hapoh ka Border Area Development Programme (BADP) la pyntrei ha ki 65 tylli ki shnong.
Ia kane u Mein u la jubab halor ka jingkylli ba la wanrah da u MLA ka Congress u Ninong Ering halor ki sienjam kiba ka sorkar jylla ka la shim namar ki kam pynroi kiba la shim da ka China ha ki jaka khappud bad ka India.
U la pyntip ruh da kaba ong shibynta ban kyntiew ha ka liang ka pule puthi la tei ia ki sawtylli ki jaka pule bathymmai jong ka Vivekananda Kendra Vidyalayas (VKVs) bad la kyntiew shuh shuh na ka bynta ki sawtylli kiwei pat kiba kum kine ki skul hapoh jong ka jingkhmih jong ka BADP ka ban kot sha ka T.80 klur.
Nalor kata u Dy. CM u la ong shuh shuh ba ia ki phra tylli ki model school la tei ha ki jaka khappud ha ki snem 2017-18.
“Khnang ban pyndap ia ki jingduna ha kaba iadei bad ki kam pyntroi ha ki jaka khappud, na ka liang ka sorkar ka la pyniaid shakhmat ia kiwei pat ki projek kam pynroi kum ka jingpyniasoh ia ki lynti surok, ki jingkieng iaid kjat, ki jaka treikam kiba iadei bad ka koit ka khiah, ka umbam um dih, ka kam bording bad kiwei pat lyngba ka jingkyrshan pisa jong ka BADP bad na ka liang ka sorkar jylla,” ong shuh shuh u Mein.
