Shillong, Lber 15: Ki shikurim bad iwei I Khun, kila shu lait salit na ka jingma ia ka jingim na ka jingtur ruma jong kawei ka trok ki BSF hajan Civil Hospital, Shillong, kaba lam sha ka jingiatai nia kaba jur bha hynne ka janmiet sngi Balang.
Kane ka jingjia kala jia ha ka por 2 baje nohphaisngi katba kine ki shikurim bad I Khun ba iashong da ka thuk thuk ML05-5069, ki dang thmu ban rung sha Civil Hospital. Kane ka thuk thuk ka dei kaba la niah da u M K Marak.
Ka trok shipai BSF ML05-W-7421 kaba dang hiar arsut na ka thain Barik, kala tur ruma sha ka thuk thuk jong u Marak wat hadien ba ula ai dak ban rung sha Hospital, haduh ba ka trok kala jan syllad ia kine ki shikurim bad I Khun.
Kane ka jingjia kala lam sha ka jingiania kaba jur bha hapdeng une u Kurim bad ki shipai BSF bad ha ka jingnang khluit ka jingiania, u shipai BSF ba niah ia ka trok ula sei da u nar rod na ka trok da ka jingthmu ban bom ia u Marak.
Da ka jingwan poi kloi jong ki Pulit pyniaid kali bad ka jingiatur jong ki riew paidbah ba iaid ba ieng na kane ka jaka, kala pynjai jai ia ka huri hura hapdeng kine ki arliang mamla.
