Jorhat, Lber 15 :Ka jingiakynad ka la khie kynsan ha ki bynta khappud ka Assam-Nagland hadien ki khubor jong ka jingwan tur ki runar ka Nagaland sha ki jaka puta jong ka Assam.
Ki khubor na ka thain ki iathuh ba ka jingwan rung beain ki runar na Nagaland sha ki jaka khlaw jong ka Dissoi valley ha khappud ka Assam bad Nagaland hapoh Marini ka long kaba jur.Ki khubor ki la kynnoh ruh ba kine ki runar Naga ki ju wan tam pud shaduh ki jaka khlaw jong ka Tiruhills bad pynjulor ia shibun bah ki jaka da kaba pom naphang ia ki dieng ki siej.
Kane ka jingjia ba dang shen kaba iadei bad ka jingwan tur pud da ki Naga kaba la wan long ruh hadien ka jingthaw sorkar thymmai ha Nagaland ka la wanrah ka jingiakynad hapdeng ki nongshong shnong kiba don hajan khappud ka Assam bad ka Nagaland.
Ki khubor ki iathuh ba ki runar Naga ki ju wan tur sha kiba bun ki jaka jong ka Assam bad pom ruh ia ki dieng kiba remdor na ka jaka kaba don marpyrshah ka Naginajan tea estate jong ka Assam Tea Corporation ha Mariani.
Kane ka jingwan pynkhihwin jong ki runar Naga sha ki jaka ka Assam ka la pynlong ia ki nongshong shnong khappud sha ka liang ka Assam ba kin pynpaw ka jingbitar ia ka jingleh myntri jong ki bor sorkar ka Assam ban shimkhia halor kine ki jingjia.
