Shillong Risaw 16 : Ka Nongkseh SSCC ka la kyrda kat kaba don ka bor ka sor ia ka jingkyntur ka Mawlai SC kat haban da ioh ia ka nam jop da 1-0 kol ha ka jingiakhun jong ka semifinal ba nyngkong ka SSA Super Cup hynne ka janmiet ha SSA Stadium, Polo.
Ia kane ka shi kol ba kordor tam ia ka Nongkseh SSCC la thep ia ka da u Banraplang Pyngrope, ha ka minit kaba 47.
Hadien ba la shah tam shakhmat da kane ka shi kol, ka Mawlai SC ka la pyrshang ba kan iakhun katba lah ban nion borbah bha ia ka Nongkseh, ha kaba hapdeng ki jingpyrshang kiba bun ki la long lehnohei namar ba kim shim la lah pat ban poi sha ka thong ne ka la wan ruh da ka jinglah ban shan tyngeh da ki rang ialehkai ba shadien ka Nongkseh.
Da kane ka jingjop, kaba sah ia ka Nongkseh SSCC ka long ba kan ap pat ia ka resol na ka jingiakhun ia ka semifinal kaba ar, kaban long lahshai ka sngi hapdeng ka MLP FT pyrshah ia ka Shillong Lajong FC kaban long ha ka por 5 baje janmiet.
Kane kan dei ka namrem kaba nyngkong ia ka Mawlai SC hadien ba ka la lah ba kan iaid shakhmat khlem da shah rem tad haduh ba kan da ioh ba kan rah ia ka nam lahduh jong ka SPL mynta ka snem, bad ban pynkynmaw biang hangne ba ha ka jingiakhun haka SPL, dei ka Mawlai kaba la pynliem da 1-0 ia ka Nongkseh.
Kumba ka juh long, ka Mawlai marsien ia sdang ka la lah ba kan kyntiew ia la ka rukom ialehkai ka jong ka, bad tang hapoh saw minit mih ka jingpyrshang borbah na kane ka kynhun, ia kaba u Daraphun Talang u la lah ba un khanglad noh ia ka, hadien kane, u Chesterpaul Lyngdoh u la pyrshang lem na ka liang ka jong u ha ka dur ka bicycle kick, ia kaba la lah ban khanglad noh pat ia ka da u Lambhamiki Lamare.
Pynban katba ka jingiakhun ka la bteng ba kan jam shakhmat, ka Mawlai SC ka la sdang ban dum ka buit ka stad ialehkai ka jong ka, namar ba ka Nongkseh SSCC na ka por sha ka por, ki la thom bad nion ka rukom ialehkai ka jong ki, hynrei haba kut ka kylla step, ki arliang ki la lah shwa ban iakhaid khlem pat don ba ioh pynkhih ia ka jar.
Hynrei u paid nongwan peitkai ne ki nongkyrshan ia ki ar kynhun kim shim la hap ban da ap slem ban shem ia ka jingkhih ka jar, hadien ba u Hardy Cliff Nongbri u la tur shakhmat ban shut ia ka freekick da kaba u la pynher nalor ka box, kaba hangne u Banraplang joit u la kynthih ban ioh head ia kane ka bol ban pynrung beit kluk shapoh ka kol.
Marsien ia shah thep kane ka kol, ka Mawlai SC ka la kyntiew ia la ka rukom ialehkai ka jong ka kum shi bynta ban iakhun ban ioh pynphai ia kane ka kol, hynrei ha kiba bun pat ki khep ba baroh 10 ngut ki rang ialehkai ka Nongkseh ki la sdang kynran beit shadien da kaba ki la shim da ka sur ban ialehkai defensive.
Ha kaba kut, ka jingjop ka Nongkseh SSCC hynne ka janmiet kada iapher haba ia nujor bad ka jingiakhun ha ka playoff pyrshah ia ka Sawmer, kaba kum ka kynhun ka la ieng tylli kawei ka buit ka bor ba long katba ka long la kut jingmut ban jop ia ka jingiakhun bad ban jam sha ka phainal.
Namar ka jingioh ban thep ia ka kol ban pynjop ia ka kynhun, u Banraplang u la ioh syndon ba un khur ia ka khusnam T7 Player of the Match, ba la aiti da u bah Donald P. Wahlang u Chief secretary barim ka sorkar jylla.
