Shillong, Risaw 16 : Shisngi shuwa ka rally ka Joint Action Committee pyrshah ia ka Laban Ropeway Project, ka Director ka tnad Tourism BL Pakyntein ha ka sngi Thohdieng kala ong ba ia kane ka project ym shym la kyntur sopsop bad ka tnad kala dep ioh ia baroh ki jingbit kiba donkam kynthup ka NoC na ka Dorbar Shnong.
Haba kren halor ka jingsngewkhia bala pynsngew da ka JAC, ka kong Pakyntein kala ong “Ka Tnad kala iakynduh ia ka JAC ban pynshai ia kiei kiei baroh kiba iadei bad ka project hashuwa ka jingiakhih ba kila pynkhreh ha ka sngi Saitjain. Ia ka jingialang la pynlong ha ka sngi Palei hapoh ka jingpyniaid ka Commissioner & Secretary Kong RM Kurbah bad la iashimbynta da ki Ophisar na ki Tnad bapher bapher”.
Ka iathuh ba ha ka jingialang, ka Commission kala ai ka jingbatai kaba bniah ha ryngkat ki stad ki jhad mariang ba khmih ia ka project, kiba iadei halor ki lad ki lynti bala shim bad ki jingbit bala ioh.
“Ngi la ioh ia ki jingbit kiba donkam kynthup ka NoC na ka Dorbar Shnong bad pyndep ia ka jingiateh kular ban shimwai hashuwa ban pyniaid shakhmat ia ka project” ong ka kong Pakyntein.
Halor ka jingong ka JAC ba kam shym la pynlong ia ka public hearing kaba thikna, kala ong “ Ka Tnad kala thoh sha baroh ki 7 Rangbah Shnong ba kyntu ia ki ban lum ia ki nongshongshnong ba kin wan sha ka hearing, katkum ka rukom kaba la ju bud ban ïatreilang bad ki paidbah lyngba ki bor synshar shnong tynrai.”
Ka kong Pakyntein kala ong ba ia ka tender la pynlait tang hadien ba ioh NoC na ka Dorkar Shnong. Ia ki contractor bala jied la bthah ba kin shim ia ki licence kynthup ka Trading Licence na KHADC.
“Ka Trading Licencec ka dang sahteng hadien ka jingpyrshah bala pynsngew da ka JAC. Ngi la pynlong ia ka jingiasyllok kaba donkam bad ioh lut ia baroh ki jingbit kiba donkam” kala ong.
Haba kyntait ia ki jingkynnoh ba kam don ka jingtreikam kaba shai, kala ong “Ngi la ju sam ia ki jingtip halor ki sienjam bala shim. Ka long kaba bakla ban ong ba ia ka project la pyniaid sopsop. Kane ka dei ka project kaba heh na ka bynta ka Jylla”.
Kala bynrap ba ia ka PIL ba iadei bad ka project ruh lah pynwai da ka Iingkashari Meghalaya High Court bad ka tnad kala dep ioh ia ka environmental clearance.
‘Ka Tnad Tourism ka long kaba kloi ban iakren bad kino kino ki kynhun ba sngewkhia ban lah pynbeit ia kita ki jingsngewkhia” kala ong.
