Shillong, Jylliew 19: U Myntri Rangbah ka Jylla Conrad Kongkal Sangma hynne ka sngi U Blei ula pyntip ba ka Sorkar kala pyrshang katba lah ban maramot noh ia ka surok National Highway (NH-6), kaba la ngam bad julor bad kaba la pynsahkut shiteng lynti ia ki spah tylli ki kali bad ki briew ha Lumshnong, East Jaintia Hills District.
Hadien ka jingjurip ia ki jaka ba julor, u Conrad ula ong ” Ngi la pyrshang kat kaba lah ban maramot ia shilynter ka surok khnang ban ioh iaid noh ki kali hynrei ka don pat ka jingeh namar ba ka jingjur slap ka dang iai bteng”.
U Conrad ula pyntip ruh ba ka Tnad PWD kala pyrshang ruh kat kaba lah ban pyniaid lynti noh na kawei ka jaka ia ka um kaba lynshop bad pynjulor ia kane ka surok.
” Ngi dei ban lah maramot noh ia ki katto katne ki bynta jong ka surok ha kine ki 24 kynta ban wan bad ban iohi noh ruh ia ka jingiaid ki kali rit na kane ka surok” ong u Conrad.
Ula bynrap ” Ngi don jingkyrmen ba lada jem noh u slap bad ailad ruh ia ngi ban trei, ngin sa lah ban iohi noh ia ka jingpyniaid kali wat ki kali heh khamtam ki kali ba kit ia ki mar ba kongsan bad kane kan urlong ha kine ki 48 haduh 72 kynta hynrei kata ruh ka shong ha ka jinghap slap”.
U Myntri Rangbah ula ong ba ia mynta hi, ki bor District kila pynbiang ia kawei pat ka lynti iaid kaba iaid lyngba ki jaka jong ki briew shimet, kiba la ailad ban pyniaid ia ki kali rit bad kane kala jia katba ngi dang iakren.
“Ki kynhun bapher bapher kila trei palat ia ka por bad ki Agency bapher bapher kila pyrshang ym tang ban pynkhuid ia kane ka surok hynrei ban pynthikna ruh ha ka ban ai ia ki jingkyrshan bad jingiarap da kaba pynbiang marbam sha ki briew kiba sahkut ha kane ka highway.
U Conrad u ong “Nga kwah ban ai khublei ia ki bor District, ka Tnad PWD bad ki kompani, ki Sengbhalang bad kiwei kiwei ki kynhun kiba la mih ban iatreilang ha kum kane ka khep ba jynjar bad kane kala iarap shisha ia ki briew bad nga thikna bad ka jingiatreilang lang, ym shem satia ba ngim lah ban pynlong biang ia kane ka surok kumba ka ju long”.
U Myntri Rangbah ula iakren ruh bad ki nongniah trok bad kular ruh ba ka Sorkar kan pyndep kloi kat kaba lah ha kaban maramot ia kane ka surok. Ula kular ruh ban ai ka jingiarap ia ki nongniah trok kiba sahkut ha kane ka highway.
Interacted with truck drivers & stranded people along damaged NH 06 in Lumshnong. We are standing by everyone through these challenging times. Have instructed DC to ensure supply of food items to the stranded people @PMOIndia @AmitShah pic.twitter.com/29loqadbz0
— Conrad Sangma (@SangmaConrad) June 19, 2022
Ia u Myntri Rangbah ka Jylla la synran da u Myntri kam Pohiing ma Lahkmen Rymbui uba dei u Chairman ka Regional Committee ba khmih ia ka Ri-lum Jaiñtia, ki bor District, ki Ophisar ka PWD bad ka NHAI.
