Guwahati, Jymmang 23: Ki Pulit ka Guwahati ki la pynpulom ïa ka jingthmu ban khaii tuh ïa ki mrad khlaw bad ioh ban pyllait im ïa ki 26 tylli ki niangbashiah bala tip kum ki Tokay Geckos hajan Basistha bad kem ïa arngut kiba la kynnoh ba ki dei ki nongkhaii tuh ha ka por ba la pynlong ïa ka jingkhynra mynmiet.
Kitei ki briew kiba la shah kem ki dei kiba la tip kyrteng kum u Ikramul Hussain uba shong ba sah ha Nagaon bad u Jamiruddin uba dei na Barpeta.
Da kaba leh katkum ki jingtip ba kyrpang jong ki riewstad, ia kane ka jingkhynra la pynlong da ki pulit Gorchuk.
“Ïa kine ki Tokay Gecko la wanrah sha Guwahati da ka thuk thuk na Karbi Anglong bad la kynnoh ba ki dang pynkhreh ban shalan shabar ka jylla lyngba ka jaka ISBT.Ngi la khanglad noh ïa ki nongshah kynnoh shwa ban pynkynriah ïa kine ki mrad” ong uwei u heh pulit.
Ki heh sorkar ki la iathuh ba ki Tokay Geckos ba la ioh kurup ki remdor bha ha ka jingkhaii beain ia ki mrad khlaw, ha kaba la iathuh ba uwei, uwei u shongdor palat 10 lak tyngka ha ka iew die black.
Ka jingkhein dor baroh jong ki mrad ba la ioh kurup la ngeit ba kan long haduh 3 klur tyngka.Khnang ban lait na ka jingshah lap, la kynnoh ba la buhrieh ia ki mrad khlaw hapoh ki thliew ba la shna da u dieng ha ka rukom ba la thmu bha.
Kane ka jingjia ka la don ka jingsngewkhi ba jur hapdeng bor ba dei khmih jong ka wildlife bad ki nongshong shnong ka thaiñ, namar ka jingkhaïi ïa ki mrad khlaw kiba duna bha la shim ba ka dei ka kam runar kaba shyrkhei katkum ka aiñ Wildlife Protection Act.
Ki pulit ki la pynlong ia ka jingtohkit kaba bniah ban pynthikna la ka don ne em ka jingiadei bad katei ka kam khaii mrad khlaw kaba kham heh hapdeng ki jylla.
