Shillong, Jymmang 23 : Ka Langsning FC kala jam sha ka semifinal na ka Group B hadien ka jinglap ban pynlien da 4-2 kol ia ka Rymbai Shkenshynriah ha ka jingiakhun quarterfinal second leg jong ka lympung 5th Meghalaya State League ba long ha ka sngi Saitjain, wat hapdeng ka jingialehkai tang 10 ngut ki rang ialehkai.
U Atlanson Kharmaw (32), Samuel Phawa (41), Dajiedlang Wanshong (70) bad Mecheal Roy Kurbah (90+2) kila ioh thep ia ka kol jong ka Langsning katba u Iaishah Bareh (48) bad Harita Suchen (90+5) kila ioh thep ia ka kol ka Shkenshynriah.
U Atlanson ula ioh thep lyngba ka free-kick kaba la pynjam shakhmat ia ka Langsning hashuwa ba u Samuel un iatyngkhuh tang para marwei ba du nongap kol ka Shkenshynriah Yooluty Dkhar ban thep ia ka kol kaba ar.
Wat hapdeng ka jingialehkai ba tam uwei u rang ialehkai, kane ka kynhun na East Jaintia Hills kam shym la lah ban shim kabu bad ialehkai bha ban pynjem khnap ia ka Langsning.
Hashuwa kane ka jingialehkai, ka Nangkiew Irat SC kala leh ia kaei kaba hap ba kan leh ba kan iai neh ha ka jingiakhun ban ioh jam sha ka semifinal da ka pynliem ia ka Maram FC da 3-1 kol.
U Justerwell Tham ula ioh thep ia artylli ki kol ha ka minit ba 28 bad 59 ha ryngkat bad u Neblejohn Lyngkhoh ha ka minit ba 89 ia ka Nangkiew Irat. Katba ka kol jong ka Maram FC kala wan lyngba u Threebirth Momin ha ka minit ba 86.
Ha ka jingkamai point, ka Langsning kala ioh 12 point bad la pynthikna ban long kawei na ki Top 2 team jong ka Group. Ka shkenshynriah bad ka Nangkiew Irat kila iakhaid mar 9 point hynrei ka Shkenshynriah kala tam ha ka head-to head. Ka jingiakynduh jong ki ha ka sngi Ba-ar kan sa rai mano ban leit sha ka semifinal. Ka Maram ka don ha trai duh da 0 point.
Ha ka sngi Nyngkong, ka kylla ba khatduh jong ka quarterfinal ka Group A kan long. Ha ka por 2 baje nohphai sngi, ka Rangdajied United FC kan iakhun pyrshah ia ka Shillong Lajong FC bad ha ka por 6 baje janmiet ka Mawlai DC kan iakhun pyrshah ia ka Nongkseh SSCC.
Watla ka Nongkseh bad ka Lajong kila pynthikna ia ka jaka ha ka samifinal, kine ki jingiakhun kin ai rai mano na kine ki ar kynhun kin kamai bun point eh ne wan hakhlieh duh ha ka Group A bad mano ban wan ba-ar.
