Shillong, Jylliew 19: Ka Sorkar Meghalaya kala pan ia ka song jingiarap ba kot haduh T. 300 klur na ka Sorkar Pdeng namar ka jingjubor ki jingpynjulor jong u slap uba wanrah ia ka jingshlei um ba itriem bad jingtwa khyndew ha kylleng ki jaka jong ka Jylla.
Ia kane la pyntip da u Myntri Rangbah ka Jylla Conrad Kongkal Sangma hadien ka jingialang bishar kam lyngba ki kor ka juk mynta, bad ki Deputy Commissioner lem bad ki Heh Ophisar jong ki Tnad bapher bapher, kaba long hynne ka janmiet sngi U Blei ha Ophis u Deputy Commission ka East Jaiñtia Hills ha Khliehriat.
Held review meeting in #EastJaintiaHills with DC & officials to assess the damages caused in the District in the past few days. Have instructed the team to take necessary actions to restore the roads & ensure supply of essential commodities @PMOIndia @AmitShah pic.twitter.com/COHJSkcBco
— Conrad Sangma (@SangmaConrad) June 19, 2022
U Myntri Rangbah ula khot ia kane ka jingialang ban shim jingkheiñ ia ki jingpynjulor ha man ki District ka Jylla ha kine ki khyndiat sngi bala leit noh. Ha kane ka jingialang , u Myntri Rangbah ua bthah ia ki Tnad ba kin iatreilang kum ka kynhun ha kaban shim ia ki sienjam ba donkam khamtam ha kaban maramot noh ia ki surok bad ka jingpynpoi ia ki mar kiba donkam manla ka sngi.
U Conrad ula pyntip ruh ba kat kum ka jinglum jingkheiñ ba dang shu kheiñ malu mala bad bala pynkhreh da ka Sorkar, la kheiñ antad ba ka jingjulor na ka jingther u lapbah ha Jylla kala kot ia ka T.300 klur.
U pyntip ba ka Sorkar kalathoh sha ka Ministry of Home Affairs (MHA), ba pyntip shaphang kine ki jingshah pynjulor jong ka Jylla bad ba kyrpad ba kan pyllait ruh ia ka song jingiarap khnang ba ka Jylla kan lah ban maramot ia ki jingjulor bad ai jingiarap ia ki lanot kiba shah ktah.
