Tura, Jymmang 23 : U Myntri Rangbah ka Jylla Conrad K Sangma mynta ka sngi ula iashimbynta ha ka jingrakhe dap shispah snem jong ka Tura Natya Samity, kawei na ki Cultural Institution kaba la rim bad ba don burom tam hapoh ka thain, kaba long u mawmer ban sah khana ha ka histori ia ka jingiaid lynti ba 100 snem jong ka Samity ban kyntiew ia ka mattithaw, dei riti, drama bad ka jingsuk jingsain ka imlang sahlang.
Ia ka jingialang plie la pynshongkun da u Myntri Rangbah kum u kongsan. Kane ka jingrakhe ka la kynmaw ia ka spah snem ka jingaiti sha ka jingpynneh pynsah ia ka deiriti, ka jingtbit ha ki kam ak drama, bad ka jingshakri ia ka imlang sahlang naduh ba seng ia ka Samity ha u snem 1926.
Haba ai jingkren ha ka jingialang, u Myntri Rangbah ula ai khublei ia ki Dkhot bad ki nongkitbok jong ka Tura Natya Samity halor ka jingkynjoh ia u mawmer ba 100 snem bad ai burom ia ki pateng jong ki nongialam, ki barikor, ki nongkit kam bad ki dkhot kiba la noh synniang sha ka jingiaid lynti jong ka Samity ha kine ki shispah snem bala leit.
“Kane ka long shisha ka sngi kaba khraw, bad ngi rakhe ia une u mawmer, ka long ruh kaba kongsan ia ngi ban phai dien ia ka lynti iaid kaba phylla ha kine ki 100 snem bala leit” ong u Myntri Rangbah. Ula ong ba ka Samity ka ieng mynta namar ka jingpyrshang ba khlem thait bad ka jingaiti lut jong ki President barim, ki Secretary, ki Barikor bad ki Dkhot kiba la aiti iala ki jingim ban pynkhlain ia ka Samity bad ban pynneh pynsah ia ka deiriti da ki pateng la pateng.
U Myntri Rangbah ula ban jur ba ka Tura Natya Samity kam dei tang ka seng ba pynneh ia ka dei riti hynrei “ka nongsumar ia ka paten jong ngi bad ka nongsakhi ba im ia ka histori” kaba la sakhi ia ka pork a British India, ka jinglait luid ka Ri India, ka jingpynkha ia ka Meghalaya, bad ka jingkylla ka Meghalaya ba mynta haba iai neh ha ka mishon ban pynneh ia ka deiriti.
Haba pynpaw ia ka bynta bala shim da ka Samity, ula ong ba naduh ba seng ia ka ha u snem 1926, ka Samity kala lamkhmat ia ki kam ak drama, ka rwai ka siaw, ka shad bad ka thoh ka tar ha ka thain, haba saindur ia ki pateng ki barikor, ki nongput nongtem, ki aktor bad ki nongthoh kot.
Haba kdew ia ka jingnang paw ka Meghalaya ha ka put ka tem bad ki kam pynbyrngia, ula ong ba ka Shillong, kaba iatip mynshuwa kum ka “Rock Capital of India” kala long mynta kum ka “Music Capital ka India”. Ula iathuh ba ka Meghalaya kala long kawei na ki jaka ba hakhmat tam na ka bynta ban pynlong ia ki Live Concert hapoh ka Ri, kaba la pynlong ia bun ki concert jong ki nongrwai ba pawnam ka pyrthei kum ka Def Leppard, Bryan Adams, Ed Sheeran, Europe, Akon bad ka Script.
“Kane ka pyni ba kumno ka deiriti kala long ka pyrnon ba pun hapdeng ka riti dustur bad ki kabu ka pyrthei” ula ong.
Ha kane ka sngi, u Myntri Rangbah ula pynbna ia ka jingiarap song pisa ba T.25 lak na ka bynta ka jingshna bad pynkhlain ia ki jingtei ha Tura Natya Samity.
Kum shibynta jong ka jingrakhe, la pynlait paidbah ruh ia ka souvenir ba buh jingthoh ia ka histori ba riewspah bad ki kam jong ka Samity.
