Shillong, Jylliew 12 : Ki Nongleit nongwan ha Shillong kin mad ia ki jingpyrrkhing iaid kali ha ki katto katne ki jaka ha ka 15 bad 16 tarik Jylliew bad ki Pulit ka East Khasi Hills kila pynbeit ia kiwei ki lynti iaid (diversion) namar ka jingdon ka North East India Infrastructure Summit & Exhibition 2026 ha LARITI, Mawkasiaing bad SRGT Parking Lot, Polo.
U Superintendent of Police Bah Vivek Syiem ula ong ba kane ka jingialang ba arsngi kan iohi ia ka jingwan iashimbynta ki Myntri ka SorkarPdeng, ki VVIP, ki kynhun ba shah khot sngewbha bad nongpyni nam na kylleng ki Jylla ka thain Shatei Lam Mihngi bad na shabar, ka ban lam sha ka jingiaid bun tylli ki kali haka shisien iaid.
Ban pynbeit ia ka jingiaid beit iaid ryntih ki kali, ki Pulit kila bthah iaki paidbah ba kin kiar ha kaban pyndonkam ia ka surok Umsawli-Mawksiang-NEIGRIHMS ha ki kynta ba long ka summit.
“Kito kiba wan na Umsawli, Mawkasiang, NEIGRIHMS bad Nongmensong shaphang ka Polo la kyntu ba kin pyndonkam noh ia ka surok ba iaid lyngba ka Mawpat-Golflink/ Langkyrding-Pynthorumkhrah ban kiar na ka jingslem” ong u SP ha ka kyrwoh ba pynlait ha ka sngi Thohdieng.
Ha ka 15 tarik Jylliew, yn buh ia ka ‘No Entry’ ha lad Lumjingshai. Ki kali kiba leit sha Forest Colony lane lad CRPF kin hap ban iaid lyngba ka Lawmali-Polo bad palat khnang ban pynkylluid ia ka Polo na ka bynta kiba wan Summit.
Ki Pulit ki khmih lynti ia ka jingjur ka jingiaid ki kali ha shilynter ka surok Polo-Mawkasiang namar ka jingiaid ki VVIP, bad kyntu ia ki nongleit nongwan ba kin pynbeit lypa ia ka leit ka wan jong ki.
 namar ka jingdon ka North East India Infrastructure Summit & Exhibition 2026 ha LARITI, Mawkasiaing bad SRGT Parking Lot, Polo.){kind=link}