Shillong, Jylliew 12 : Ka Sorkar Jylla ka dang ap ia u Myntri Rangbah duh ka Ri Narendra Modi ba un buh tarik na ka bynta ban plie ia ka Shillong Medical College, ong u Myntri ka Koit ka Khiah ka Jylla Bah Wailadmiki Shylla haba pynthikna ba ka jingpyntrei ia ki jingtei jong ka Tura Medical College kala dep kumba 95%.
Haba kren ha ka jingialang ha Shillong, u Bah Wailad ula ong ba ka Sorkar kala pyrshang ban buh ia ka tarik ban plie ia ka Shillong Medical College hynrei kala la hap ban pynsangeh noh namar ki jingiatakhuh bad kiwei pat ki kam.
“La arsien ngi la rai ia ki sngi plie, hynrei hadien kila mih noh kiwei ki kam, kumta ngi la hap ban pynsangeh shuwa” ula ong haba iakren bad ki nongthoh khubor.
U Myntri u bynrap ba ka Sorkar ka dang don beit hapdeng ka jingiakren bad ka Ophis u Myntri Rangbah Duh ka Ri.
“Wat haduh mynta ngi dang don beit ha ka jingiakren bad ngi dang ap ia ka tarik na u Myntri Rangbah Duh. Dang shen, nga la pynkynmaw ia u Myntri ka Koit ka Khiah ka ri ha ka jingplie ia ka ARHI Hospital ba ngi dang ap ia ka tarik bad ka porn a u Myntri Rangbah Duh” ong u Bah Wailad.
Halor ki kam jong ka Tura Medical College, u Bah Wailad ula ong ba ki jingtei kila jan dep artad. “Ki jingtei kila dep kumba 95% lada phi iakren halor ki jingtei.Halor ka jingthungkam, ngi la dep pynmih ia ka jingpynbna ban thungkam nonghikai” ula ong.
Hynrei, ka jingwan thep kam kala iaid kum u wieh haduh mynta. “Sngewsih, kiba aplai ki duna bha, hynrei ngi dang kyrmen ban gin ioh ia baroh ki nonghikai ba donkam” bynrap u Myntri.
