Pynthikna u Himanta ban treikam ka UCC ha baroh kawei ka Ri kynthup ka Assam

Guwahati, K’lyngkot 28 : U Myntri Rangbah ka Assam Himanta Biswa Sarma ula ong ba ka Uttarakhand kala wanrah ia ka Uniform Civil Code (UCC), kan treikam ha baroh kawei ka Ri bad hadien yn sa pyntreikam ruh ha Assam.
Haba iakren bad ki nongthoh khubor, u Himanta ula ong “Ka Uttarakhand kala wanrah ia ka Uniform Civil Code (UCC). Yn sa pyntreikam ia ka ha baroh kawei ka Ri bad yn sa pyntreikam ha Assam ruh”.
“Ka Sorkar Assam kam pat shim rai ia ka UCC baroh kawei, ngi dang pynleit jingmut halor ka Muslim Registration Bill kaba ngin pynlong kongsan. Ngi la ong ba ka jingpynrung kyrteng ia ka kam shongkurim bad pyllait san shyieng yn sa leh da u Sub-Registrar ha ka jaka u “Qazi”. Ka sienjam ban wan jong ngi ka long ban khein beain ia ka jingiashongkha bun ngut ki kynthei kaba lah ban wan ha kano kano ka por bad ngi dang ap ia ki jingkynthoh na ki Iingkashari halor ka Uttarakhand UCC. Ngi la phaikhmat bha ia ka” ong u Sarma.
U Sarma ula ong “Ngim kwah ban wanrah ia ka UCC kaba bun ki jnit ki jnat namar ka kam jong ngi ka iapher bha. Ngi la ialeh pyrshah ia ka kam shongkha khynnah. Ngi la ialeh pyrshah ia ka jingiuhroit ia ki Kynthei. Ka nongrim jong ngi ka iapher bak ly bak”.
Ha u Nailar 2024, ka Iingdorbar ka Assam kala mynjur ia ka Muslim Marriage Registration Bill 2024 bad ka Registration of Marriage with Minor ia kaba la khein kam beain bad ia ka register ia ka kam shongkha ki Muslim yn sa leh da ka Sorkar ym da u Qazi.
Ka Assam kala mynjur ruh ia ka Assam Repealing Bill, 2024 ban pynduh noh ia ka Muslim Marriages and Divorces Registration Act, 1935, bad mynjur ia ka Assam Compulsary Registration of Muslim Marriages and Divorces Bill, 2024