Shillong, K’lyngkot 27 : U Kyrtong shimet na Sohryngkham Dr OS Jyrwa hynne ka sngi Nyngkong ula ban jur ia ka jingdonkam ba ka Khasi Hills Autonomous District Council (KHADC) ban thaw ia la ka jong ka building byelaws khnang ba kan ym don ka jingpyndik ia ki paidbah kiba sah ha ki thain̈ nongkyndong.
Hadien ba la dep thep kyrteng ha ophis jong ka Deputy Commissioner, u Dr Jyrwa ula ong ba un shim ia kane ka mat lada u shah jied ha kane ka elekshon.
Ula kynnoh ba ki briew ha ka constituency kila shah ktah jur ha ka building byelaws jong ka Council bad ula ong ba kadei kaba shu bud bad tah ne “copy paste” na ka Meghalaya Urban Development Authority (MUDA) building byelaws.
“Kumta ka jingpyntreikam ia katei kajuh ka building byelaws ha ki thain nongkyndong ka long kaei kaei ka bym iahap. Ka por kala dei ba ngin don noh ia la ka jong building byelaws na ka bynta ka thain nongkyndong” bad ula ong ruh ba ki shnong kiba hap ha ka New Shillong Township kila mad ia ka jingeh kaba khraw namar ka jingshim ha ka dor kaba rem katkum ka Building Byelaws jong ka Council kaba mynta.
U Dr Jyrwa ula iakhun ia ka elekshon MLA ha u 2008, 2013 bad 2023 hynrei ym shim la ioh ia ka jingjop.
“Namar ba ngi lah wan ba-ar ha ka elekshon MLA, ki paidbah ki sngew ba nga dei ban iakhun ia ka elekshon MDC. Nga lah kyntait ia ka jingtyrwa ka jongki naduh ka elekshon MDC ha u snem 2014 bad ngam shym la iakhun ruh ha u snem 2019. Nga sngew ba kane ka kynti kaba mynta nga dei ban sngap ia ki paidbah” ula ong haba pynthikna ba un iada ia ki paid riewlum bad ia ki jaka ki puta ki jongki lada u shah jied ban mihkhmat sha KHADC.
“Ngin ia trei shitom bha ban jop ia ka elekshon.Ngi don ia la ka jong ka nongrim bad halor katei hi ngin leit sha ki paidbah ban pan ia ka jingkyrshan” la pynkut u Dr Jyrwa.
