Shillong, K’lyngkot 28 : Arngut ki kyrtong ka Khun Hynniewtrep National Awakening Movement, kila pyndep iaka jing thep kyrteng hynne ka sngi ba-ar hakhmat ki Returning Officer ka ISBT, Mawlai Mawiong bad Ophis ka DC.
Kine ki arngut ki kyrtong ki kynthup ia u Bah Peter Shallam u ban aireng na Laitumkhrah-Malki constituency lem bad u Bah Joseph Pyngrope na Sohryngkham.
Haba iakren bad ki nongthoh khubor, u Bah Peter Shallam ula ong “Ngi donkam ban shim khia bha ia ka elekshon KHADC. Ngi donkam ban shimkhia ia ki snong nongkyndong khamtam ki nongshongshnong kiba shah ktah ha ka jingduk bad mad ia shibun ki jingeh na ka jingbym don jaka puta”.
Ula ban jur ruh ia ka jingdonkam ban pynkylla ia ka United Khasi Jaintia Autonomous District (Appointment and Succession of Chiefs & Headmen) Act, 1959 bad ong “Kum ka nuksa ha Ri-Bhoi, ki Khlieh Nongsynshar kila shim kabu da kaba ohdor kaba heh ha ka jingiadie iathied jaka. Kane kala ktah ia ki paidbah kiba thied jaka ban rep ban riang. Kumta ka donkam ia ka KHADC ban pynkylla ia kane ka Act”.
Ula buh jingkylli ruh ia ki Executive Committee bala leit noh jong ka KHADC namar ka jingbym lah ban ai jubab ia ki jingkylli jong ka Home Ministry halor ka Village Administration Bill (VAB), 2014.
