Nongpoh, Nailar 05: Ka Butcher Association of Meghalaya (BAM) bad ka Ri Bhoi Welfare Organization (RBWO) hynne ka sngi thohdieng, kala pynrem jur ia ka jingpynthut jong ki Doktor ka Tnad Veterinary ia ki kali kit masi jong ki Nongshohdoh ka Jylla.
Kane ka jingpynrem kala mih hadien ka jingshah bat jong kawei ka kali kit masi , kaba la jia hynnin ka sngi palei ha ki thain Umsning.
Haba iakren bad ki lad pathai khubor, u President ka BAM Bah Erson Marwein bad General Secretary ka RBWO Bah P Jones Kurbah, kila kynnoh ba ki Doktor ka Tnad Veterinary kila shu bat jubor ia kane ka kali kit masi kaba kit ia ki masi na Umsning da ka jingthmu ban pyndonkam tang ban otdoh ban pyndap ia ka jingdonkam u paidbah ha ki iew ki hat.
Kine ki Nongialam kila kynnoh ruh ba ki Doktor ym tang ba ki bat ia ka kali kit masi, hynrei kila rah ruh ia kane ka kali bad ia ki masi sha ka Umsning Police Outpost ban register case.
“Ngi pynrem jur ia kane ka jingleh ki Doktor ka Veterinary khamtam ba kine ki masi ki dei kiba la thied nala ka jong ka Jylla” kila ong haba bynrap “Balei ba kim bat shuwa ia ki muid kiba wanrah na shabar ka Jylla kiba la shu ioh rung laitlan sha Jylla”.
