Shillong, Nailar 05: U Symbud Myntri Rangbah ka Jylla Bah Prestone Tynsong, ula pyntip sha ka kynhun ki Nongialam ka Sur ka Bri U Hynniewtrep ba ka Sorkar Jylla kan sa rah sha ka Iingdorbar Thaw Ain ka Jylla ia ka kaiphod jingtohkit halor ka jingshah siat iap u Nongialam barim ka HNLC Bah Cheristerfield Thangkhiew.
Ia kane la pyntip da ki Nongialam ka Sur ka Bri U Hynniewtrep hadien ka jingkhot iakren u Symbud Myntri Rangbah ka Jylla hynne ka janmiet, kaba la jia hadien ka jingleit tur paidbah sha Secretariat ban dawa sei madan noh ia ka kaiphod jingtohkit jong u Judge bala shongthait Justice T Vaiphei.
“ U Symbud Myntri Rangbah ula pyntip ba ka Sorkar kan sa rah ia ka kaiphod jingtohkit sha ka Iingdorbar Thaw Ain ha ka 9 tarik Nailur, kaba dei ka sngi sdang jong ka Dorbar” ong u samla Donboklang Kharlyngdoh, Nongialam ka Sur ka Bri U Hynniewtrep.
“ U Symbud Myntri Rangbah ula kyrpad ia ngi ban long kiba iai shah. Mynta ngin ap shwa la ka urlong shisha ne em kata ka jingkular ban sei paidbah ia ka kaiphod ha ka 9 tarik u Nailur” ula bynrap.
Haba pyntip ba ha ka jingiakynduh, ka Sur ka Bri u Hynniewtrep kala dawa jur ia ka sorkar ba kan pyllait paidbah noh ia ka kaiphod, une u Nongialam ula ong “U Justice T Vaiphei ula dep aiti ia ka kaiphod naduh u bnai Jymmang 2022. Lada kane ka kaiphod ka long kaba thiang ngin da kmen shibun hynrei lada dei kaba jew, ngin hap ban shim da kawei pat ka lynti”.
Ha kajuh ka por, u samla Donboklang ula pyntip ruh ba ka Sur ka Bri U Hynniewtrep kala dawa ia ka Sorkar Jylla ba ka dei ha kaban pynthikna ban pynshitom ia ki briew kiba donkti ha kaban siat iap ia u Bah Cheristerfield Thangkhiew bad dei ruh ban weng kam shisyndon ia ki.
Hashwa kane, ka Sur ka Bri Hynniewtrep kala leit ban tur paidbah sha Secretariat ban pynpaw ia ka dak ka jingpyrshah jur ia ka jingpynslem ka sorkar ban pyllait paidbah ia ka kaiphod u Justice T Vaiphei.
U Justice T Vaiphei uba khlieh marwei ia ka jingtohkit, ula sdang ia ka jingtohkit naduh u bnai Nailur 2021 ia ka jingshah siat iap u Bah Cheristerfield Thangkhiew hala ka jong ka Iingsah kaba jia ha ka 13 tarik Nailar 2021.
Une u Judge ula kylli tohkit ia kane ka jingjia na ki 6 ngut ki Heh Pulit ka Jylla kiba don bynta ha ka jingkhynra ia ka Iingsah u bah Cherist lem bad 4 ngut ki bahaiing hasem u Bah Cherist lem bad arngut ki Doktor.
U Justcie T Vaiphei ula aiti ia ka kaiphod jingtohkit ha ka 20 tarik Jymmang 2022 ha ka kti jong u Myntri Rangbah ka Jylla Conrad Kongkal Sangma.
