Tura, Nailar 05: Ka Iingkashari Judicial Magistrate First Class ka West Garo Hills, kala ai jingmynjur ia ka jingpan por sa 6 sngi jong ki Pulit ban tohkit ia u MDC ka BJP Bernard N Marak halor ka jingkynnoh pyniaid ia ka kam khaii met hapoh ka farm shimet jong u.
Ki Pulit ka West Garo Hills kila ialam tian bishar biang hynne ka sngi thohdieng ia une u MDC bad Vice President ka BJP ka Jylla, uba la ioh ban kem na Jylla Uttar Pradesh hadien ka jingphet rieh wat hapdeng ka hukum ban wan pyndem ialade da ka Iingkashari.
Ki Pulit kila ialam tian bishar ia une u Nongialam ka BJP ban pan por biang sa 6 sngi khnang ban lah ngam jylliew ia ka jingtohkit halor ki jingjia kiba jia ha ka farmhouse jong u kaba don ha Edenbari, West Garo Hills.
“Ngin rah tian bishar ia u Bernard hapoh ka Iingkashari Judicial Magistrate First Class bad ngin pan por sa 6 sngi ban tohkit. Ngi kyrmen ba ka Iingkashari kan mynjur ia kane ka jingpan por” ong u VS Rathore Superintendent of Police ka West Garo Hills hashuwa ban rah ia une u MDC sha Iingkashari.
U Chief Judicial Magistrate ka Tura ula phah set haduh 8 sngi ia u Bernard ha ka Police Custody hadien ba la wanrah ia u sha Garo da ka kynhun kyrpang ki Pulit ka Jylla na Uttar Pradesh.
Ka jingpynmih ia ka Look Out Notice ha baroh kawei ka Ri India kala lam sha ka jingioh kem ia une u MDC ka BJP na kawei ka taxi bad ka khubor Pulit ka kynnoh ba u Bernard ula pyrshang ban jam sha Nepal lyngba ka UP.
Ka jingkem ia une u MDC ka BJP kala wan jia hadien ba ki Pulit kila ioh kyndang ia ka kam khaii met hapoh ka farm house jong u kaba don ha Edenbari, kaba lam sha ka jingiohkem ia 73 ngut ki briew bad ioh pyllait ia 6 ngut ki Khynnah kiba shah set jubor ha kane ka jaka.
Ha ka jingkhynra ki Pulit ia kane ka farmhouse, kila ioh ruh ban kurup ia bun bah ki tiar pynbthei, ki ryntih bad khlam, ki jingdih pynbuaid bad kiwei kiwei.
