Shillong, Naiwieng 01 : Ka Tnad Meghalaya Police kala pynngat haduh 15 tylli ki kyndon IPC pyrshah ia u General Secretary ka Federation of Khasi Jaintia & Garo People (FKJGP) Bah Eldie N Lyngdoh ba kynthup ia 6 tylli ha Laitumkhrah Police Station bad 9 tylli ha Sadar Police Station.
Ka Shillong Sadar Police Station kala khot hajir ia une u Nongialam ka FKJGP hynne ka sngi ba-ar halor ka case bala pynngat da ka Laitumkhrah Police Station kat kum ka ejahar bala register halor ka jingshah shoh ki briew bad shah pynjulor ki kali ha ka jingiaid rally jong ka FKJGP myn ha ka 28 tarik ha ki thain Malki bad Dhankheti.
Ki kyndon ba la pynngat ia une u Nongialam ha Laitumkhrah Police Station ki kynthup ia ka 341/324/353/505/506/34 IPC
Lah ban kdew ba ka FKJGP haka 28 tarik u bnai Risaw kala pynlong ka jingiaid paidbah na Motphran shaduh Madan Iewrynghep halor ka jingkyrduh kam ki samla bad ha kane ka jingiaid paidbah, ki nongiaid rally kila shoh briew bad pynjulor ia ki katto katne ki kali bad arshaka.
Haba kren sha ki lad pathai khubor u bah Eldie u la iathuh ba na ka liang ka Laitumkharh Police Station ka la pynngat haduh 6 tylli ki kyndon pyrshah ia u haba pyntip ba ka Shillong Sadar Police Station pat kala pynngat haduh 9 tylli ki kyndon.
U bah Eldie ula iathuh ba ki kyndon bala pynngat ha Laitumkhrah Police Station ki kynthup ia ka kyndon 341/324/353/505/506/34 katba jong ka Shillong Sadar Police Station ki long 120 (B)/141/323/341/353/427/505/506/ bad 34 IPC.
Une u Nongialam ka FKJGP u pyntip ba ka Shillong Sadar Police Station kala khot hajir ia u ha ka 4 tarik mynta u bnai kat kum ka ejahar bala register halor ki jingjia kiba mih na ka rally ha ki thain Police Bazaar.
Haba kylli, u Bah Eldie ula ong ba ka seng ka shim ia ka jingkitkhlieh halor kiei kiei kiba jia na ka Rally bad kum u nongialam, u long uba kloi ban leit haba shah khot hajir ha ki Pulit.
