Nongpoh, Naiwieng 01 : Ka Dorbar Shnong Pahammawlein ha ryngkat ka KSU-20 Mer Circle bad ka Northern Border Area, hynne ka sngi ba-ar, kila leit ban khang khyrdep shipor ia ka khyrdop khrong khajna jong ka National Highway Authority of India (NHAI) namar ka jingbym burom ka kompani ia ka No Objection Certificate (NoC) ka Shnong.
Shuwa kane, ka Dorbar Shnong bad ka KSU, kila leit iakynduh ia u Manager jong kane ka kompani ba pyniaid ia ka khyrdop hynrei kim shym la iakynduh satia, kaba la pynbor ia ki Nongialam Shnong bad ka KSU ban khang syndor shipor ia ka khyrdep bad ban pyllait ei khlem jingsiew ia ki kali ba iaid ba ieng lyngba kane ka khyrdop.
Ki Pulit ka Byrnihat Police Station haba ioh jingtip ia kane ka jingjia, kila her wut wut sha kane ka jaka bad hadien ka jing iakren sngewthuh bad ki Nongialam Shnong, la lah ban plie biang ia kane ka khyrdop bad ban sdang ruh ia ka jinglum khajna.
Haba kren bad ki Nongthoh Khubor, u Bah Kyrmun Sylliang, Rangbah Shnong ka Pahammawleiñ bad u Bah Prince Sylliang ki la ïathuh ba kane ka jingkhang ïa ka khyrdop ka long halor ka nongrim ba u Manager ka kompani um shym la burom satia ïa ka rukom pynïaid shnong da kaba um shym la pynthymmai shuh ïa ka No Objection Certificate ba dei ban shim na ka Dorbar Shnong bad ruh um ju burom ïa ki nongpynïaid shnong.
Ki la kynnoh ruh ba u ne u Manager u ju donkti ruh ban leh heh leh meng bad um ju burom ïa ki nongtrei ha kane ka khyrdop khrong khajna kiba dei ki khasi bad dang shen ruh u ne u Manager u la pharep ïa kawei ka nongtrei ba ka donkti ban tuh pisa hynrei ka jingshisha pat kam dei kumba la pharep.
Na ka liang ka shnong ka la bthah ïa u Manager ba u dei ban pyndep noh marmar ban pynthymmai ïa ka NOC bad ruh ba un burom ïa ki nongtrei lym kumta ka shnong bad ka KSU kin sa shim pat ki lynti kiba tyngeh.
