Shillong, Nohprah 13: U Myntri ka Sorkar Jylla Bah Sanbor Shullai ula pynlong ia ka jingrakhe lypa ia ka Khristmas bad Snem Thymmai na ka bynta ki nongshong shnong jong ka South Shillong constituency, ha kaba la lum lang ia baroh ki Balang Khristan, ki nongkitkam shnong bad ki nongshong shnong.
U Bah Sanbor Shullai, uba long ruh u MLA ka South Shillong, ula ai jingiarap ruh da ka song tyngka sha ki Balang bad sha ki Dorbar Shnong kum shi bynta ban ioh ban pynkhreh ia ka jingrakhe Khristmas bad Snem Thymmai ba kan long kaba jop bad kaba shongkun.
Nalor kane, ha kane ka jingialang kaba la long ha State Convention Centre, Shillong la sam ruh ia ki jingai sngewbha sha ki khynnah rit bad ia baroh kiba la wan ban iashimbynta ha kane ka jingrakhe.
“Kum u MLA, kadei ka kamram ka jong nga ban ai jingiarap da ka pisa ia baroh ki Puja Committee bad ia ki Balang bapher ban pynthikna ba ka jingpynlong ka jongki ia ki jingrakhe kaba dap da ka jingkmen bad jingsngewbha” ong u Bah Sanbor.
Ula kyntu ia ki nongshong shnong, ba kidei ban pynsaphriang ia ka jingieid bad ka jingkmen, khamtam eh ha ki aiom jong ka jingialehkmen.
“Nga dap da ka jingkmen ban iohi ba ki briew na ki niam bapher bapher kin ia wanlang ban pynlong ia kane ka jingrakhe kaba jop” ula ong.
Ha kane ka sngi la ioh ruh ia ki jingrwai Khristmas kaba la iashimbynta da bun ngut ki nongrwai hynrei kaba la khring bad pynsngewtynnad ia baroh kiba la wan, kadei ka jingtem ia ki sur jingrwai da ka Cathedral Band.
