Shillong, Naitung 10: Ka Umrynjah Sports and Culture club kum shi bynta ban ioh ban khmih bniah bad ban sei ia ki rangialehkai donsap na ka bynta ka jingpynkhreh ban ioh rung sha ka lympung iakhun jong ka Shillong Sports Association ka la pynlong ia ka Inter-house football tournament ha madan shnong.
Napdeng ki san tylli ki Kynhun (team) kiba la ia shim bynta, ka Team A ka la iohrah ia ka namlahduh hadien ba ka la pynliem iaka Team B ha ka final ba la iakhun haka sngi Saitjain.
Ha kane ka tournament la ia don ryngkat u MDC ka Mawlai konstitwensi u Bah Teiborlang Pathaw, u Bah Dipshon Lyngdoh Nongbri uba long ruh u dkhot jong ka SSA bad kiwei kiwei.
Haba ai jingkren ha kane ka sngi u Bah Teiborlang Pathaw ula pynpaw ba u don shibun ki jingthmu ban kyntiew ia ki Sports Club kiba na Mawlai kiba la ioh rung ha ka SSA bad na ka liang jong u un iarap katba lah ban pynbiang ia ki jingdonkam jong kine ki sports club khnang ba kin ia kop kyrdan lang bad kiwei ki club.
Katba na ka liang u Bah Dipshon u la pynpaw ba kam don jingeh na bynta ka Umrynjah Soprts Club ba kin ioh rung ha ka SSA namar ba ki don la ka jong ka Madan football bad ba ki donkam ia ka No Objection Certificate (NOC) na u Rangbah Shnong ban pyndon kam ia ka Madan football shnong.
U Bah Dipshon u la kyntu ruh ia ki Sports Club Mawlai ba kin ia shim bynta ruh ha kiwei pat ki jait sports kum ka Cricket kaba don shibun ki lad ban kyntiew ia ki Nongialehkai wat haduh ka National level.
