Shillong, Naitung 10 : Kumba 18 ngut ki MDC na ka iing ba 30 ngut ki Dkhot jong ka Khasi Hills Autonomous District Council (KHADC) kila shut iala ki jongki reng ban pynkhreh mih madan ha ka elekshon MLA kaban long ha u snem ban wan.
Da kaba sdang shwa na Ri Bhoi District, na ki san ngut ki MDC tang arngut kiba la tikna ba kin aireng haduh mynta bad kine ki dei ka Kong Macdalyne Sawkmie Mawlong i ban aireng na ka NPP na Nongpoh bad u Bah Charles Marngar u ban aireng naka Congress na Mawhati Constituency.
Ha East Khasi Hills pat, na ki 17 ngut ki MDC kiba don kynthup lang ia kito kiba bat lang ia ka kam MLA, haduh 11 ngut ngut kiba la tikna ba kin aireng.
Kine ki kynthup ia u Bah Pyniaid Sing Syiem na Mawryngkneng (dei ruh u MLA), Bah Martle N Mukhim na Mawkynrew, Lambor Malngiang na Nongkrem ( (dei ruh u MLA), Kong Grace Mary Kharpuri na Nongshken, Bah Alvin Sawkmie na Mawsynram, Bah Tittostarwell Chyne na Sohra, Bah Ronnie V Lyngdoh bad Bah Mitchel Wankhar na Mylliem, Bah PN Syiem na Pynthorumkhrah, Bah Paul Lyngdoh na Jaiaw bad Bah Teibor Pathaw na Mawlai.
Na West Khasi Hills pat kaba don san ngut ki MDC, kiba la tikna haduh mynta ban aireng ki kynthup ia u Bah GabrieL Wahlang na Nongstoin, Bah Gigur Myrthong (dei ruh u MLA) na Mawshynrut bad Bah Batskhem Ryntathiang na Mairang. Tangba na ka liang u Bah Batskhem haduh mynta um pat pyntikna namar u ong ba ia ka rai kaba khatduh un sa shim ha u bnai Riwaw ne Naiwieng mynta usnem.
Na South West Khasi Hills pat kaba don arngut ki MDC, kitei baroh arngut kata u Bah Pius Marwein (dei ruh u MLA) ka Langrin kumjuh u MDC ka Mawkyrwat Bah Carnes Sohshang ki la pyntikna ba kin iakhun beit.
Na baroh ki constituency dei tang ka Mylliem ba ka jingiakhun ka iatyngkhuh hapdeng arngut ki MDC bad uwei u MLA.
