Shillong, Naitung 10: Ka Bharatiya Janata Party (BJP) South Shillong, hynne ka sngi U Blei kala dawa ba dei ban sospon noh ia u National Executive Member bad Myntri barim ka Sorkar Bah A.L.Hek namar ki kam ba long pyrshah ia ka Party.
Ka BJP South Shilong, kala buh jingkylli ruh halor ka jingiadei kaba iajan hapdeng u Bah Hek bad u Nongialam ka Liang Pyrshah jong ka All India Trinamool Congress (AITC) Dr Mulul Sangma.
U Vice President ka BJP Shillong Unit u P Sharma ula ong baka jingialang kaba la long hapoh ka Ophis jong ka Party ha Kench’s Trace, Lumshatsngi, kala pynrem jur ia ka liang bala jied da u Bah A.L Hek. Kane ka pyni ba u Bah Hek u pyrshang ban shim kabu tang ban myntoi ha ka kam sain pyrthei naka jingjia ba jia ha Orchid Lake Resort.
Kat kum ka jingong jong u, une u MLA ka Party ula sei pyrthei ia ka jingjia kaba shu jia ryngkhat hapoh ka kamra jingalang bad ka dei ka kam ka bym lah satia ban pdiang da lei lei ruh.
Namar kane, ka BJP South Shillong ka dawa ban ai jingsneng pyrshah ia u Bah Hek uba la leh ia ki kam kiba pynthohbria ia ka Party.
“Ka Party kan hap ban shimkhia ia ka jingkren u Bah Hek bad dei ban leh ia kaei kaei kaba iahap ba kan long ruh ka nuksa ba ym don mano mano ruh kiba halor jong ka Party bad ba dei ruh ban sospon ia ki tad haduh ban sa shim rai da ki nongialam na Delhi” ong u Sharma.
Une u Nongialam ka BJP ula ong ba watla ia kane ka kam la kren ne wanrah da u President ka UDP Bah Metbah Lyngdoh, hynrei la pyni pynban kumba jia ia u Bah Hek u la lamkhmat. “Kane ka jinglong arsap ka dei ka bym lah satia ban pdiang bad ka Party ka dei ban khmih bad ai jingsneng halor kane” ula ong.
“Ka jingshah thombor ki Khristan rit paid ba la kren da u Bah Metbah kala shah pynthut ha u Bah Shullai uba ngeit bad ieng ha ka nongrim baka BJP ka dei ka Secular Party hynrei u bah Hek ula pyrshah ia kane ka jingkam u Bah Shullai” ula bynrap.
Haba kynnoh ba u bah Hek ula pyrshang ban pyniapait ia ka sorkar MDA, u Sharma ula ong “Kane ka pyni ia ka jinglong arsap u Bah Hek ban pyniapait ia ki paralok ba iatreilang ha ka MDA bad ruh ban phiah ia ka jingiadei paralok hapdeng ka BJP bad ka UDP ha ka NEDA”.
Une u Nongialam ka BJP ula buh jingkylli ruh lada u Bah Hek, uba iajan bad u Dr Mukul bad kiwei ki Dkhot ka TMC, u pyrshang ban thaw iala ka jong ka Forum (Party)”. Ula ong ba u bah Hek hadien ba u la shah weng naka shuki Myntri Sorkar, ula shu jah lynti noh.
U Sharma ula ban jur ruh ba ka por kala dei ia ka BJP ban pyntreikam iala ki ain ki kyndon bad ban pynsangeh ia ka jing khwan myntoi jong u Bah Hek kaba long palat ia ka bha ka miat jong ka Party bad jong ka Jylla/
