Shillong, Jylliew 19: Ka Meghalaya State Zoo ha ka sien kaba nyngkong eh kala lah ban pynkha ia ki khun shrieh ba la tip kum ki Stump-tailed Macaque, kiba dei ki kynja mrad kiba la don ha ka Red List jongka IUCN.
La kha dang shen ia iwei i khun shrieh ba khlain, kaba pyni ia ka sienjam jong ki bor khmih jong ka Zoo ne jaka ri ia ki mrad ia ka jinglah ka jongki ha kaban sumar sukher.
Ka Jylla kala ioh pdiang ia shi jur kitei ki shrieh na ka Aizawl Zoological Park, Mizoram lyngba ka prokram jong ka jingsam mar kylliang ia ki mrad.
Ki ophisar kiba khmih ia ka Zoo kila ong, ba ka jinglah ban kha ia i shrieh Macaque ka pyni ba kine ki jait shrieh ki lah ban shah bad ban heh ban san ia ka jinglong jingman ka suinbneng ha Shillong bad ka pyni ruh ia ka jingbiang ha ka rukom sumar sukher ia ki mrad, ka jingai jingsumar bad ka rukom khmih katkum ka jingpyndonkam ia ka jingstad saïan.
Kine ki shrieh kidei ki jait mrad kiba la mad ia ka jingeh bad kila sdang ruh ban duhjait, jingbym roi bad ka jingmad ia ka jingshah pyndik ha ki briew.
Kane ka jingkha ia ine i shrieh kala nang kyntiew ia ka jingiada ia kine ki jait mrad lyngba ka jingpynroi hapdeng ka jingshah set bad jingshah sumar sukher bad ka jingpyrshang ruh ban ialeh ban pynroi ia kine ki shrieh.
Ine i khun shrieh mynta i don hapdeng ka jingshah khmih bniah ha ki nongsumar jong ka Zoo bad i donlang bad la ka kmie bad ka kynhun jongki. Ki ophisar kila ong ba ine i khun shrieh i don ha ka met kaba koit ba khiah bha.
“Kane ka long kaba ai mynsiem ia ka jingpyrshang ban iada bad ban pynroi ia ki mrad hapoh ka jylla Meghalaya” ong u D. Sathiyan, PCCF (Wildlife & Biodiversity) & Chief Wildlife Warden.
Ula bynrap ba kane ka jingseisoh ka pyni ia ka jingpynleit jingmut ka jylla ha ka jingiaid kane ka juk, ka jingsumar sukher kaba la lamkhmat da ka jingstad saïan bad ban iada ia ki mrad kiba don hapdeng ka jingma.
Ula pynpaw ruh ba ki kamram jong ki Zoo ha kaban ialeh ban pynsngewthuh ia ki paitbah ban iada bad pynneh pynsah ia ki mrad na ka bynta ka lawei jong ki pateng ban dang wan.
Ka Tnad Forests & Environment ka Sorkar Meghalaya, kala ong, ba kane ka jingjop ha kaban pynkha ia i khun shrieh kan nang pynkhlain ia ka jingnoh synniang ki Zoo ia ki prokram jong ka ri bad ka thain na ka bynta ki mrad kiba don hapdeng ka jingma ban duhjait noh.
