Shillong, Risaw 5: Ka Sorkar Jylla hynne ka sngi Nyngkong, kala ong ba ym donkam ban phah tohkit ha ka CBI halor ka jingleit khynra ha Jaiaw kaba la pynlong ha ka 19 tarik u Nailar bad la kyntait ia kane ka jingdawa jong u MLA ka North Shillong u Bah Adelbert Nongrum.
U Symbud Myntri Rangbah ka Jylla uba khmih ia ka Kam Pohiing u Bah Prestone Tynsong ula ong, ia ki nongthoh khubor ba kino kino ki jingduna ha ka rukom treikam, lada ki don, kidei kiba lah ban pynbeit da ka tnad pulit ka jylla.
“Kumba long haduh mynta, ngim donkam ban leit sha ka CBI. Hooid kino kino ki jingduna bad ki jingleh bakla ki lah ban jia hateng hateng, hynrei ia kine lah pat ban pynbeit” ong u Bah Tynsong.
Ula ong, ba ula bthah ia ki heh pulit ba kin pynbha ia ka jingiatreilang bad ki bor shnong hashwa ban kin leit pynlong ia kano kano ka jingkhynra.
“Nga lah bthah ia ka DGP bad ia ka Home (Police) ba kidei ban pynbha shuh shuh da kaba leit sha baroh ki bor kiba dei khmih, haba ki don ia kano kano ka jingthmu ban leh eiei” ula ong.
“Ki bor shong kidei ki paralok kiba iatreilang, kidei shi bynta ban pynneh ia ka shongsuk shongsain na ka por sha ka por” la bynrap u Bah Tynsong.
